Ольга Захарова: «Эр хоһууттарбыт этэҥҥэ эргиллэн кэлэллэрин эрэнэ кэтэһиэҕиҥ!»

Бүгүн Өрөспүүбүлүкэ күнүгэр аналлаах уопсастыбаннас үөрүүлээх мунньаҕын Президиумугар Үөһээ Бүлүү улууһун волонтера Ольга Петровна Захарова кыттыыны ылла.

Үөрүүлээх мунньах Дьокуускай куоракка Опера уонна балет тыйаатырыгар, муус устар 26 күнүгэр, ыытылынна.
Ольга Петровна Кэнтик нэһилиэгиттэн төрүттээх, Ороһу нэһилиэгин кийиитэ бэйэтэ бултаан, балыктаан, астаан байыаннай дьайыы кыттыылаахтарыгар күннэтэ гуманитарнай баһыылкалары оҥорон ыыта турар. Бэлиэтээн эттэххэ, Ольга Захарованы байыаннай дьайыыга сылдьар байыастар Балыксыт Ольганан билэллэр, мэлдьи сибээскэ тахсан билсэллэр.

«Мин аҕабын, байанайдаах булчут Тумусов Петр Петровиһы удьуордаан, хара тыаттан куобахтаан, мас көтөрдөөн, кустаан, балыктаан, байыаннай дьайыыга сылдьар саха уолаттарыгар кэһиибин мунньан, биир сылга 3.5 т саха аһын-үөлүн Хабаровскай, Владивосток, Уссурийскай, Санкт-Петербург, Москва госпиталларыгар уонна инники кирбиигэ сылдьар байыастарбытыгар ыыттым.
Кыһыҥҥы өттүгэр бэйэм балыктаан уонна Үөһээ Бүлүү балыксыттарыттан бэриһиннэрэн астаан ыытабын. Сороҕор бурдук аһынан оскуолалар көмөлөһөллөр уонна биирдиилээн нэһилиэк олохтоохторо дойду аһын бэрсэн үөрдэллэр. Сайынын уолаттарбын кытта балыктаан, балыкпытын тууһаан, буһаран, хатаран, ыыһаан ыытабыт», — диэн волонтерскай үлэтин туһунан үрдүк сыанаттан Ольга Петровна иһитиннэрдэ.
«Дойдуга үөскээбит тыҥааһыннаах кэмҥэ үчүгэйи ыраланан, киэҥ көҕүстэнэн, бэйэ-бэйэни ытыктаһан олоруоҕуҥ. Байыаннай дьайыыга сылдьар эр хоһууттарбыт кыайан-хотон, этэҥҥэ эргиллэн кэлэллэрин эрэнэ кэтэһиэҕиҥ, биһигиттэн тутулуктааҕы хааччыйа туруоҕуҥ.», — диэн Ольга Захарова түмүк тылыгар Саха сирин олохтоохторун ыҥырда.
Киэн туттабыт амарах сүрэхтээх, кыайыыга эрэллээх, Кыайыы туһугар сүҥкэн кылааты киллэрэр биир дойдулаахпытынан диэн Үөһээ Бүлүү улууһун дьаһалтата иһитиннэрэр.

Хаартыскалар: Үөһээ Бүлүү улууһун дьаһалтатыттан