Хаартыска: куйаар аһаҕас ситимиттэн
Швейцария күрэсчиттэрэ биир күҥҥэ икки кыһыл көмүс мэтээли ылан, уопсай көрдөрүүгэ иккис миэстэҕэ таҕыстылар. Италияҕа ыытыллар Олимпиада-2026 үһүс күнүгэр уопсайа биэс мэтээл кэмпилиэгэ оонньонно. Ол эрээри, мэтээллэр кэтэһиллибэтэхтик түҥэтилиннилэр.
Холобур, Норвегия уонна АХШ мэтээлэ суох хааллылар. Оттон Швейцария тута икки кыһыл көмүһү ылла уонна онон тохтообото, диэн Арассыыйа успуордун Федерацията иһитиннэрэр.
Швейцария хамаандата биир күҥҥэ түөрт наҕарааданы хомуйда. Дойдуга ордук ситиһиилээҕинэн хайа хайыһарыгар эр дьоҥҥо хамаанданан ситиһиилэрэ буолла. Франьо фон Алльмен Танги Неф көмөтүнэн бу Оонньууларга бастакы икки төгүллээх чөмпүйүөн аатын ылла. Бу көрүҥҥэ Марко Одерматт уонна Лоик Мейар үрүҥ көмүс мэтээли ыллылар. Өссө биир кыһыл көмүһү швейцарка Матильда Гремо дьахталлар слоупстайлларыгар ситистэ, оттон күн бүтүүтэ Грегор Дешванден эр дьоҥҥо трамплинтан ыстаныыга боруонса мэтээли ылла. Ол курдук, биир күҥҥэ – 2 кыһыл көмүс, 1 үрүҥ көмүс уонна 1 боруонса мэтээл.
Үс күн түмүгүнэн Швейцария 3 кыһыл көмүс, 1 үрүҥ көмүс уонна 1 боруонса мэтээллээх. Бу уопсай хамаанданан мэтээл көрдөрүүтүн табылыыссатын баһылаан иһэр Норвегияттан биир эрэ боруонсанан аҕыйах. Норвегия, Америка уонна Италия хамаандалара бэнидиэнньиккэ мэтээлгэ тиксибэтилэр. Оттон бастыҥ үс дойду иһигэр Япония киирдэ – кинилэр билигин 2 кыһыл көмүс, 2 үрүҥ көмүс уонна 3 боруонса мэтээллээхтэр.
Ону кытта Олимпийскай оонньууларга фигурнай хаҥкылааһыҥҥа эр дьоҥҥо соҕотохтуу кылгас көрдөрүүлэр күрэхтэһиитэ ыытылынна. Арассыыйа хаҥкыһыта Петр Гуменник судьуйалартан 86,72 баалы ылан 12 миэстэҕэ сылдьар. Кылгас бырагыраама түмүгүнэн 108,16 бааллаах Илья Малинин (Америка) бастакы иһэр, оттон иккис 103,07 бааллаах Юма Кагияма (Дьоппуон), үһүс 102,55 бааллаах Адам Сяо Хим Фа (Франция). Петр Гуменник күрэхтэһиигэ бастакынан тахсыбыта уонна нүөмэрин Эдгар Акобян Waltz 1805 муусукатынан толорбута. Эр дьоҥҥо көҥүл бырагыраама күрэхтэһиитэ бээтинсэҕэ буолуоҕа. Арассыыйа Олимпиадаҕа бэйэтин күрэсчиттэриттэн бастакы наҕараадаларын кэтэһэр.
Боксаҕа Арассыыйа үтүөлээх маастара, Олимпийскай оонньуулар кыттыылааҕа, аан дойду чөмпүйэнээтин үрүҥ көмүс призера Василий Егоров…
Дьокуускай куораттааҕы үөрэх управлениета иһитиннэрбитинэн, олунньу 11 күнүнээҕи туругунан, 20 үөрэх тэрилтэтигэр ОРВИнан сибээстээн быстах…
Ханнык баҕарар балыгы буһарыах иннинэ маринадка туруордахха, олус минньигэс буолар. Оттон ону эбии пиибэлээх клярга…
Суруйааччы Константин Эверстов кылгас кэм иһигэр икки саҥа кинигэтэ таҕыста. Ол курдук, ааспыт сыл ахсынньытыгар…
Фронт кирбиитигэр саха конструктордара оҥорбут сеткомёттарын бэрэбиэркэлээн көрөн баран, байыаннайдар үрдүк сыананы биэрдилэр. Бу туһунан…
Арассыыйа Баанын Саха сиринээҕи салаатыгар түөкүттэргэ албыннаппаттарын уонна үптэрин-харчыларын сүтэрбэттэрин туһугар килийиэннэрин көмүскээбит баан үлэһиттэрин…