Олимпиада көҥүл тустуутун «Модун» успуорт комплексыгар быһа көрдөрүөхтэрэ

Парижка ыытыллар Олимпийскай оонньууларга Саха сириттэн төрүттээх түөрт уол көҥүл тустууга кыттыахтаах. Саха дьоно-сэргэтэ бу ураты түгэни көрөөрү долгуйа күүтэллэр.  

Онон сибээстээн Саха сиригэр көҥүл тустууну сэҥээрээччилэр көҕүлээһиннэринэн атырдьах ыйын 8-11 күннэригэр Дьокуускай куоракка төрүт успуорт көрүҥнэрин сайыннарар «Модун» успуорт комплексыгар Олимпийскай оонньуулартан быһа холбонуулары көрдөрүөхтэрэ.

Биир дойдулаахтарбыт Владимир Егоров, Виктор Рассадин, Айаал Лазарев уонна Георгий Окороков тустууларын быһа эпииргэ көрдөрүөхтэрэ.

Тустуу күн ахсын киэһэ 18:00 чаастан саҕаланара күүтүллэр диэн иһитиннэрэллэр.