Олоҕу ылынабын махталынан

Бу күннэргэ Ньурба улууһун киин бибилэтиэкэтэ «Үрүҥ торуоска» ыйын чэрчитинэн Ньурбатааҕы көрбөттөр уопсастыбаларыгар «Олоҕу ылынабын махталынан» диэн түмүктүүр тэрээһини ыытта.

Күрэскэ уопсастыба кэрэ аҥаардара, Далбар хотуттара кытыннылар. Дьүүллүүр сүбэҕэ Ньурбатааҕы көрбөттөр уопсастыбаларын бэрэссэдээтэлэ С.М.Яковлева, Ньурбатааҕы оҕо ускуустубатын оскуолатын дириэктэрэ И.Н.Николаев, Ф.Г.Сафронов аатынан киин бибилэтиэкэ ааҕааччыны кытта үлэлиир салаатын бибилэтиэкэрэ Е.И.Софронова үлэлээтилэр. Тэрээһини бибилэтиэкэр Г.Е.Николаева тэрийэн ыытта.

Күрэс биэс түһүмэҕин түмүгүнэн кыайыылааҕынан Екатерина Лазерева – Далбар Хотун (Маар с.) буолла. Анал ааттар:
Антонина Ксенофонтова – Мааны Хотун (Ньурба), Ирина Казакова – Иэйии Хотун (Ньурба), Светлана Степанова – Күбэйэ Хотун (Антоновка с.), Валерия Баишева – Талба Хотун (Маалыкай с.), Эмма Васильева – Сайдам Хотун (Маалыкай с.), Мария Захарова – Ыллам Хотун (Бүлүү) буоллулар.

Добун суруктары, сэмэй бэлэхтэри күрэс кыттыылаахтара ытыс тыаһыгар доҕуһуоллатан туттулар. Дьүүллүүр сүбэ түмүк таһаарар кэмигэр, көрөөччүлэр «Дойдум миэнэ — Ньурба» викторинаҕа кыттан минньигэс бириискэ тигистилэр. Илья Николаев ылбаҕай ырыаларын истэн астыннылар.

Ыраахтан кэлбит ыалдьыттар, кыттааччыларт көхтөөх тэрээһиннэр ыытылла туралларыгар баҕа санааларын тиэрдэн, махтанан тарҕаспыттар.

Хаартыскалар:  Ф.Г.Сафронов аатынан Ньурбатааҕы киин бибилэтиэкэттэн