Олох хабыр хапсыһыыларыттан кыайыылаах тахсыбыттара

Бүгүн  Саха Өрөспүүбүлүкэтин норуодунай суруйааччыта, СӨ култууратын үтүөлээх үлэһитэ, П.А.Ойуунускай аатынан судаарыстыбаннай бириэмийэ, Саха хомсомуолун бириэмийэтин  лауреата, Томпо улууһун бочуоттаах гражданина Егор Петрович Неймохов төрөөбүтэ 74 сыла.

«Умнууга барбыт чулуу тустуук Вячеслав Карповы 1975 сылтан киэҥ эйгэҕэ биллэр гына таһаарбыт киһинэн  оччолорго суруйааччынан биллэ илик Егор Неймохов буолбута. «Сэргэлээххэ сааскы күн» диэн кэпсээнинэн оччотооҕу ситиһиилээх тустууктар олохторугар көрсөр ыарахаттарыгар дьон болҕомтотун аан бастаан туһаайбыта.  Ити кэпсээн кэлин  «Хапсыһыы» сэһэн тахсарыгар бастыҥ олук буолбута. Саха литературатыгар саҥа  жанр – успуорт тиэмэтэ  арыллан элбэх ааҕааччы кутун туппута.

Вячеслав сэһэни эһээтигэр оттуу тахса сылдьан,  оччолорго “Хотугу сулус” сурунаалга бэчээттэммитин булан,  соҕотоҕун ампаарга сытан аахпыта уонна тутатына кини Толя Доҕоороп «прототиба» буоларын билбитэ. Наһаа соһуйбутун уонна  сорох түгэннэри  хантан билэн суруйбутун бэркиһээбитин кистээбэтэҕэ.  Сэһэн дьоруойа  кэлин көнөр суолга, олох хапсыһыытыгар кыайыылааҕынан тахсыбытынан астыммыта. Онон Саха тыйаатырын режиссера Василий Фомин “Хапсыһыы” испэктээги  туруорбутугар премьераҕа сылдьыбыта.  «Төһө да уруккуну санатар ыарахан буолбутун иһин, баары баарынан, олоҕу кырдьыгынан суруллубут сэһэн билигин да  суолталааҕын көрдөрдө», —  диэбитэ.

Кинилэр Егор Петровичтыын кэлин ыкса билсибиттэрэ, доҕордоспуттара. Ол түмүгэр олохторун тиһэх күннэригэр тахсыбыт  «Ат өрөҕөтүнэн, уорҕатынан олох» диэн  Вячеслав Карпов түһүүлээх-тахсыылаах, ыраас мууска ууран биэрбит олоҕун кэпсээнин кинигэтэ буолбута. Вячеслав ити сыл сүрэҕинэн ыалдьан эпэрээссийэлэммитэ, оттон норуодунай  суруйааччы Егор Неймохов кинигэ бэчээттэнэн тахсан, бастакы экземпляры туппут үөрүүтүн эрэ билбитэ…

2 тыһыынча ахсаанынан тахсыбыт кинигэ кэлин «Бичик» кыһатыгар кылгатыллан, «Бүдүрүйбүт көнөр» сиэрийэҕэ тахсыбыта (Карпов В.»Очурга оҕустарыы, кыайыыга кынаттаныы»).

Бүгүн, тапталлаах суруйааччыбыт Егор Петрович Неймохов төрөөбүт күнүгэр, альбомҥа бу хаартысканы көрөн соһуйдум.  Вячеслав эдэр эрдээҕинээҕи имиллибит хаартыскатын Егор Петрович кэнники түспүт хаартыскатыгар кэккэлэһиннэри укпутун саҥа өйдөөн көрдүм. Олох араас очурдарыгар төһө да оҕустардаллар, олох хабыр хапсыһыыларыттан  кыайыылаах тахсыбыттар кинилэр буоллахтара – саха  тустууктарын өрөгөйдөөх күннэрин үйэ-саас тухары  үйэтиппит Саха Өрөспүүбүлүкэтин норуодунай суруйааччыта Егор Неймохов уонна улуу тириэньэр Д.П.Коркин үөрэнээччитэ,  саха уолаттарыттан бастакынан Сэбиэскэй Сойуус чөмпүйүөнэ  буолар ааты ситиспит Вячеслав Карпов.

Татьяна Петровна Карпова