«Олох инфраструктурата» нацбырайыак эрэгийиэннээҕи суолларга куттал суох буолуутун хааччыйар

«Олох инфраструктурата» нацбырайыак олоххо киириитинэн, 2025 сылга Саха сиригэр эрэгийиэннээҕи уонна нэһилиэктэр икки ардыларынааҕы суолларга куттал суох буолуута биллэрдик тупсубута. Бу туһунан Саха сирин суолга управлениета иһитиннэрэр.

Бырайыак чэрчитинэн суоллары өрөмүөннээһин уонна саҥардыы кэнниттэн, ааспыт сылга 1281 суол бэлиэтэ, 969 сигнальнай остуолбалар, 18599 миэтэрэ хаххалыыр күрүөлэр уонна 2107 миэтэрэ тутуһар сыҥаһалаах күрүө, ону таһынан 316 уот тирэхтэрэ туруорулуннулар.

Өссө суолларга куттал суох буолуутун хааччыйар туһуттан, 2025 сылга суол быраабылатын кэһиини хаартыскаҕа, видеоҕа устар 10 саҥа систиэмэ атыылаһыллан туруорулунна. Уопсайынан федеральнай, эрэгийиэннээҕи уонна муниципальнай суолларга 160 маннык комплекс үлэлиир.

Бырайыак тэрээһиннэрин түмүгэр, 2025 сыл түмүгүнэн суол туругун мөлтөҕүттэн тахсар суол быһылааннара 2024 сыллааҕар 40% кыччаабыт, өлбүт дьон ахсаана – 50%, эмсэҕэлээбиттэр – 60% аҕыйаабыт.