«Олоххун уларыт!» аахсыйаҕа дьиэлэрин оҕолоругар былдьаммыт аҕам саастаахтар кытыннылар

Дьокуускайга дьиэтэ суох дьоҥҥо анаан  «Олоххун уларыт!» аахсыйа 13-с түһүмэҕэ түмүктэннэ. Тэрээһин туһунан СӨ киһи быраабар боломуочуйалааҕын пресс-сулууспата иһитиннэрэр.

Быйыл көмө көрдөөн 50 киһи кэлэ сырытта. Дерматовенерологка 44 киһи, наркологка 47 уонна фтизиатрга 48 киһи сырытта. Сифилис, гепатит уонна сэллик ыарыылары буллулар. 11 киһини суһаллык стационарга ыыппыттар.

Түөрт киһиэхэ саҥа пааспар оҥорбуттар, өссө түөрт киһи сарсын оҥорторон ылыахтара. Манна кэлбит дьоҥҥо «Линия жизни» уонна «Маяк помощи» пуондалар көмөлөстүлэр.

17 киһи үлэҕэ киирээри сүбэ-ама ылла. Икки киһи Хаҥалас улууһугар бааһынай хаһаайыстыбаҕа үлэлии, олоро барда. 10 киһи приюкка миэстэ көрдөөбүт. 36 киһи психологы кытта кэпсэппит.

Аахсыйаҕа оҕолоругар дьиэлэрин былдьаппыт аҕам саастаах дьон бастакытын кытынна. СӨ киһи быраабар боломуочуйалааҕа Сардаана Гурьева аахсыйаҕа кыттыбыт былаас уорганнарыгар, уопсастыбаннай тэриллиилэргэ, урбаанньыттарга, кыттааччыларга махтанна.