Олохтоох бэйэни салайыныы күнүнэн Ил Дархан Айсен Николаев эҕэрдэтэ

Ытыктабыллаах муниципальнай тэриллиилэр баһылыктара, дьокутааттара, муниципальнай сулууспа бэтэрээннэрэ уонна үлэһиттэрэ!

Саха Өрөспүүбүлүкэтин салалтатын уонна тус бэйэм ааппыттан эһигини Арассыыйа Федерациятыгар олохтоох бэйэни салайыныы күнүнэн эҕэрдэлиибин!

Олохтоох бэйэни салайыныы уопсастыба сайдыытыгар, дойдуга бэриниилээх буолууну үөскэтиигэ, эрэгийиэн таһымыгар үгэс буолбут сыаннастары бөҕөргөтүүгэ уонна дьоһун быһаарыылары ылыныыга сүрүн оруолу ылар. Судаарыстыба бэлиитикэтин олоххо киллэрэргэ кыттыыгыт, эппиэтинэскит, тус бэйэҕит көҕүлээһиҥҥит уопсай сыалы- соругу ситиһэргэ – Саха сирин олохтоохторун олоҕун-дьаһаҕын уонна доруобуйатын тупсарарга тирэх, күүс буолар.

Бу күн эһиги хас биирдиигитигэр өрөспүүбүлүкэбит олоҕор көхтөөхтүк кыттаргыт, Саха сирин дьонугар-сэргэтигэр сөптөөх эйгэни үөскэтиигэ тус кылааккыт иһин махталбын тиэрдэбин.

Эрэгийиэн экэниэмикэтин уонна социальнай эйгэтин сайыннарыыга, олохторун усулуобуйатын тупсарыыга дьоһуннаах хардыылары бииргэ көмөлөөн оҥоробут. Бары күүспүтүн холбоон үөскээбит харгыстары туоруубут, үрдүк ситиһиилэргэ дьулуһабыт.

2024 с. дойдуга улахан уопсастыбаннай-бэлитиичэскэй бэлиэ түгэн буолбута — РФ Бэрэсидьиэнин быыбара аан дойду болҕомтотун тардыбыта. Маныаха биһиги сомоҕолоһуубутун, үрдүк гражданскай эппиэтинэспитин, лиидэрбитин  – Владимир Владимирович Путины кытта бииргэ үлэлэһэргэ бэлэммитин биллэрбиппит улахан суолталааҕын көрдөрбүтэ. Эһиги кыһамньыгытынан биһиги өрөспүүбүлүкэбитигэр быыбар үрдүк таһымнаахтык ааспыта — куораттарга, сэлиэнньэлэргэ, нэһилиэктэргэ, Саха сирин ыраах сытар муннуктарыгар дьон бэйэтин санаатын биллэрэрин туһугар сөптөөх усулуобуйа тэриллибитэ.

Быыбар хампаанньата аһаҕастык уонна дьэҥкэтик үлэлээбитин түмүгэр, өрөспүүбүлүкэ үрдүнэн дьон кыттыыта 71,57% тэҥнэспитэ. Өлөөн, Анаабыр улуустарыгар быыбарга 97% уонна 92% куоластаабыттара. 80-тан тахса % куоластааһын Таатта, Горнай уонна Үөһээ Бүлүү улуустарыгар бэлиэтэммитэ. Оттон өрөспүүбүлүкэ 14 оройуонугар 70 % — 79 %- ҥа диэри куоластаабыттара бэлиэтэнэн турар.

Быыбар түмүгэ биһиги Бэрэсидьиэммитин өйүүрбүтүн көрдөрөр. Билигин биһиги дойду салалтатын туруорбут соруктарын олоххо киллэриигэ үлэлиэхтээхпит. Бу национальнай бырайыактары олоххо киллэрии, РФ Бэрэсидьиэнэ Уһук Илини сайыннарыыга туруорбут боппуруостарынан сорудахтары толоруу буолар. Биллэн турар, биһиги байыастарбытын уонна кинилэр дьиэ кэргэттэрин өйүүргэ көмө боппуруоһа эмиэ турар.

Биһиги муниципальнай тэриллиилэрбит өрөспүүбүлүкэни инники күөҥҥэ таһаарарга үлэлэһэллэр. Билигин биһиги сорукпут — муниципальнай өҥөлөрү оҥорууну сыыппараҕа киллэрии, өҥөлөрү оҥорууну судургутутуу. Маныаха баһылыктар тус кыттыылара, бырабыыталыстыбаны кытары тиһиктээхтик, бииргэ үлэлэһиилэрэ наада.

Ытыктабыллаах муниципальнай тэриллиилэр баһылыктара!

Судаарыстыбаннай уонна муниципальнай былаас органнарын сүрүн соруга – Саха сирин дьонун-сэргэтин олоҕун-дьаһаҕын  таһымын, хаачыстыбатын тупсарыы.

Бииргэ буоллахпытына иннибит диэки эрэллээхтик хардыылыыбыт. Ханнык баҕарар харгыстары бииргэ тутуһан сырыттахпытына этэҥҥэ туоруурбутугар эрэнэбин. Сомоҕолоһуу, хардарыта көмөлөсүһүү биһигини туох да харгыстан иҥнибэт бигэ тирэхтээх оҥорор.

Өрөспүүбүлүкэ уонна дойду бүттүүнүн туһугар үлэҕитигэр ситиһиилэри баҕарабын! Эһиэхэ уонна эһиги чугас дьоҥҥутугар чэгиэн доруобуйаны, дьолу-соргуну баҕарабын!

Саха Өрөспүүбүлүкэтин Ил Дархана А.С. Николаев