Олохтоох бэйэни салайыныы саҥа федеральнай сокуон барылын дьүүллэһиитэ көһөрүлүннэ

Судаарыстыбаннай Дуума бэрэссэдээтэлэ Вячеслав Володин олохтоох бэйэни салайыныы саҥа федеральнай сокуон барылын эһиил дьүүллэһиэхтэрэ диэн ТГ-ханаалыгар иһитиннэрдэ.

Кини этэринэн, Судаарыстыбаннай Дуума Сэбиэтин чилиэттэрэ олохтоох бэйэни салайыныы тэрийии уопсай бириинсиптэрин туһунан сокуон барылын дьүүллэстилэр: «Сокуон барылыгар киирбит этиилэри уонна санаалары учуоттаан эбии үөрэтиигэ уонна үлэлэһиигэ наадыйар».

Олохтоох бэйэни салайыныы туһунан саҥа сокуону ылыныы боппуруоһа турбута ыраатта. Сокуон барыла 2020 сыллаахха ылыныллыбыт Арассыыйа Конституциятыгар публичнай былаас биир кэлим систиэмэтин туһунан уларытыыны киллэриигэ олоҕурар.