Олохтоох бэйэни салайыныы туһунан сокуоҥҥа саамай сүрүнэ — боломуочуйалар

Сокуон олохтоох бэйэни салайыныы өйдөбүлүн быһаарар уонна дьоннор олохтоох бэйэни салайыныыны олоххо киллэрэр бырааптарын, ону тэҥэ сокуонунан бэрээдэктиир бириинсиптэрин көрдөрөр.

Бу туһунан суруналыыстарга Ил Түмэн олохтоох бэйэни салайыныыга сис кэмитиэтин бэрэссэдээтэлэ Владимир Прокопьев иһитиннэрдэ.

Арассыыйа бэрэсидьиэнэ Владимир Путин кулун тутар 20 күнүгэр судаарыстыбаннай былаас биир кэлим систиэмэтигэр олохтоох бэйэни салайыныыны (ОБС) тэрийии бириинсиптэрин быһаарар сүрүн сокуоҥҥа илии баттаабыта. Сокуон олохтоох бэйэни салайыныы өйдөбүлүн быһаарар уонна дьоннор олохтоох бэйэни салайыныыны олоххо киллэрэр бырааптарын, ону тэҥэ сокуонунан бэрээдэктээһин бириинсиптэрин көрдөрөр.

“Өрөспүүбүлүкэ баһылыгын быһаарыытынан, хамыыһыйа тэриллиэхтээх, — диэтэ Прокопьев.  — Бу хамыыһыйа “дорожнай каартаны”, тэрээһин былаанын оҥоруохтаах, тоҕо диэтэххэ, сүрүн сокуон ылыллыбытын кэннэ, биһиги бэйэбит үгүс ахсааннаах сокуоннарбытыгар уонна ситэриилээх уорганнар атын нормативнай-сокуоннай аахталарыгар уларытыылары киллэриэхтээхпит”.

Владимир Прокопьев, дьон бастатан туран, бу сокуоҥҥа саамай сүрүнэ боломуочуйалар буолалларын өйдүөн наада, диэтэ.

“Бу боломуочуйалары хайдах тыырабытый, нэһилиэк таһымыгар тугунан дьарыктаныахтаахпытый, тугу бас билиэхтээхпитий, хайдах дьаһаныахтаахпытый, улуус таһымыгар ханнык боломуочуйалар бэриллэллэрэ наадатын уонна судаарыстыба таһымыттан ханнык боломуочуйалары олохтоох бэйэни салайыныы уоргана толоруон сөптөөҕүн быһаарыахтарын наада. Биһиги, Ил Түмэн бэрэссэдээтэлэ спикер Алексей Еремеев салайааччылаах, Амма, Чурапчы, Таатта, Үөһээ Дьааҥы, Эбээн Бытантай, Бүлүү, Үөһээ Бүлүү улуустарыгар сылдьыбыппыт», — диэтэ кини. — Барыларыгар кыайан сылдьыахпыт суоҕа дии саныыбын, ол эрээри кыалларынан элбэх сиргэ сылдьан, дьон санаатын истиэхпитин баҕарабыт».

Кини дьоҥҥо туһаайан дьүүллэһиигэ кыттарга уонна этиилэргитин Ил Түмэҥҥэ аадырыстаан ыытыҥ диэбитин Ил Түмэн пресс-сулууспата иһитиннэрэр.