Хаартыска: ааптар түһэриитэ.
Бүгүн Ил Түмэҥҥэ былааннаммытын курдук парламентскай истии буолла. Манна ВКС нөҥүө Саха сирин 445 олохтоох бэйэни салайынар уоргана холбосто, элбэх киһилээх дэлэгээссийэ кэллэ. Онон истиигэ хабыллыбыт дьон ахсаана баһаам.
Владимир Прокопьев, олохтоох бэйэни салайыныыга Ил Түмэн бастайааннай кэмитиэтин бэрэссэдээтэлэ:
“Бүгүҥҥү тэрээһини, сүрүннээн, олохтоох бэйэни салайыныы боппуруостарынан күннэтэ дьарыктана олорор дьон тугу этэллэрин истээри оҥордубут, — диир Владимир Прокопьев. — Балай да элбэх, ол быыһыгар интэриэһинэй этиилэр киирдилэр, олор бары үөрэтиллиэхтэрэ. Сокуон барыла алтынньы 27 күнүгэр киирбитэ, ол күн 445 олохтоох бэйэни салайыныы уорганыгар ыытыллыбыта. Алтынньы 28 күнүгэр Ил Түмэн саайтыгар турбута, онон элбэх киһи көрөр уонна дьүүллэһэр кыаҕа үөскээбитэ. Күн бүгүн сокуон бастакы барылын ааҕыыны кэтэспэккэ, ким баҕарар суругунан бэйэтин этиитин киллэрэр кыахтаах. Биллэн турар, биһиги нэһилиэктэр, улуустар өттүлэриттэн этиилэр түмүллэн киириэхтэрин баҕарабыт, оччоҕуна үлэлиирбитигэр, үөрэтэрбитигэр ордук табыгастаах буолуоҕа”.
Владимир Прокопьев этэринэн, сокуон барылын үлэтэ саҕаланна. Сэтинньи 26 күнүгэр бастакы ааҕыыга сүнньэ ылыллан, иккис ааҕыыга бириэмэтэ ананан, чопчуланан, сокуон быйылгы сыл бүтүөн иннинэ ылыллыахтаах. Тоҕо диэтэххэ 33 №-дээх федеральнай сокуон быһыытынан 2027 сыл тохсунньу 1 күнүттэн үлэлиэхтээх.
“Сокуон билигин ылылыннаҕына, улуустар, нэһилиэктэр устааптарын уларыталларыгар кыах, бириэмэ баар буолар, — диир олохтоох бэйэни салайыныыга Ил Түмэн бастайааннай кэмитиэтин бэрэссэдээтэлэ. — Ол иһин быйыл эрэ ыллахпытына, кинилэргэ оннук кыах үөскүүр уонна эһиил 60-тан тахса сокуоҥҥа уларытыы киллэрэрбитигэр бириэмэ баар буолар.
Оттон боломуочуйаларын чааһынан эттэххэ, сокуоҥҥа саамай сүрүнэ боломуочуйа, баһылыгы талыы да буолбатах. Боломуочуйа диэн тугуй? Бу ким тугунан дьарыктаныахтааҕый, ким туох иһин эппиэттиэхтээҕий, ким ханнык боппуруоһу быһаарыахтааҕый диэн ыйытыкка хоруйдуур. Онон боломуочуйа төһөнөн чопчутук, чуолкайдык суруллар да, соччонон үлэлииргэ үчүгэй. Иккиһинэн, бу билиҥҥи бырайыакка олохтоох бэйэни салайыныы уорганнарын боломуочуйалара балачча кэҥээри турар, онон элбэх боппуруоһу быһаарар буолуохтара. Ол курдук боломуочуйалар бары аадырыстаныахтара, кыайар кыахтаах, үптээх-харчылаах муниципалитет олохтоох бэйэни салайыныытын уоргана диэн атын, дотацияҕа олорор олохтоох бэйэни салайыныы эмиэ элбэх. Онон итинник түгэннэр бары учуоттаныахтара. Үсүһүнэн, боломуочуйаны быйыл биэрдиҥ да, ол 50 сыл турар диэн буолбатах. Хайдах туттулларыттан, төһө быраактыкаттан көрөн хамсыыр, уларыйан биэрэр идэлээх. Онон ити өттүнэн үчүгэй өрүттэрдээх. Онон бу сокуону ыллахпытына, сахабыт норуотугар олох туһалаах уонна саамай сөптөөх буолуоҕа диэн эрэннэрэбит”.
Бу ый саҥатыгар Норуоттар икки ардыларынааҕы “Саха сирин бриллианнара” хаар уонна муус оҥоһук бэстибээлигэр араас…
Ааһан эрэр 2025 сыл Өймөкөөн улууһун олохтоохторугар айылҕа иэдээнэ -- алдьатыылаах халаан үгүс хоромньуну оҥорон,…
Саҥа дьылга эҕэрдэлэһэн буостанан аккырыыкка ыытыһар үтүө үгэс баара. Ол аныгы үйэҕэ уларыйан турар. Ол…
Саҥа дьыл үүнэр түүнүгэр оҕолуун-уруулуун бары туох эмит дьиктини, уратыны, аптааҕы күүтэбит. Чаһы кураана охсорун…
Бэйэлэрин норуоттарыгар үгүс дьоһуннаах айымньылары хаалларбыт суруйааччылар ааҕааччы өйүттэн-санаатыттан сүппэттэр, кинилэр үлэлэрэ көлүөнэттэн көлүөнэҕэ тириэрдиллэн,…
СӨ Доруобуйа харыстабылыгар министиэристибэтэ мэдиссиинэ тэрилтэлэрин бырааһынньыктааҕы уонна өрөбүл күннэргэ -- ахсынньы 31 күнүттэн тохсунньу…