Олоҥхо Ассоциациятын Көһө сылдьар киэҥ ыҥырыылаах мунньаҕа

Бэҕэһээ, муус устар 12 күнүгэр, Аммаҕа, Национальнай эпоһы харыстааһыҥҥа “Олоҥхо Ассоциацията” өрөспүүбүлүкэтээҕи уопсастыбаннай тэрилтэ киэҥ ыҥырыылаах көһө сылдьар мунньаҕа үрдүк тэрээһиннээхтик ыытылынна.

Мунньахха Дьокуускай куораттан Олоҥхо Ассоциациятын Сүбэтин чилиэннэрэ, педагогтар, уһуйааччылар, олоҥхону тарҕатааччылар, олоҥхоһуттар — 20 киһилээх дэлэгээссийэ тиийэн, кыттыыны ылла. Мунньаҕы СӨ Олоҥхо Ассоциациятын Бэрэсидьиэнэ Февронья Васильевна Шишигина иилээн-саҕалаан ыытта.
Биллэрин курдук, эһиил 2024 сылга Олоҥхо ыһыаҕа Амма улууһугар ыытыллар. Онон, көрүллэр боппуруостар чопчулар. Бастакытынан: “Амма улууһугар 2024 сылга ыытыллар Олоҥхо Ыһыаҕар бэлэмнэнии хаамыытын туһунан”.
Иһитиннэриини “Амма улууһа” МТ баһылыгын солбуйааччы, Олоҥхо Ассоциация Амма улууһунааҕы филиалын салайааччыта Нюргуяна Ивановна Илларионова оҥордо.
Иккиһинэн: “Үөрэх тэрилтэлэригэр олоҥхо педагогикатын олоххо киллэрии уонна олоҥхо эйгэтин тэрийии туруга, соруктара”.
Манна иһитиннэриини научнай методическай уонна тас сибээскэ үлэҕэ Олоҥхо киинин сүрүннүүр исписэлииһэ Ульяна Михайловна Флегонтова оҥордо.
Үсүһүнэн: “СӨ Үлэ уонна Арассыыйаҕа Педагог уонна Настаабынньык сылынан өрөспүүбүлүкэтээҕи былааҥҥа киирбит бырайыактары олоххо киллэрии туһунан”.
Бу боппуруоска иһитиннэриини оҥордо
Олоҥхо Ассоциация бэрэсидьиэнэ Февронья Шишигина.
Иһитиннэриилэртэн көстөрүнэн, Аммаҕа Олоҥхо ыһыаҕар бэлэмнэнии саҕаламмыта балачча буолбут. СӨ Бырабыыталыстыбатын Бэрэссэдээтэлин солбуйааччы, Тэрийэр хамыыһыйа бэрэссэдэтэлэ Сергей Местников салалтатынан иккитэ мунньахтаабыттар. Тэрээһин симиэтэтэ бу күннэргэ бигэргэниэхтээх эбит. Олоҥхо институтун кытта бииргэ үлэлэһии түмүгэр Аммаҕа ыытыллар Олоҥхо ыһыаҕын Кэнсиэпсийэтэ оҥоһуллубут. Бэс ыйын саҥатыгар эмиэ бигэргэниэхтээх. Тэрийэр хамыыһыйа быһаарыытынан, Олоҥхо ыһыаҕын үөрүүлээхтик аһыы сүрүн режиссерунан биир дойдулаахтара, РФ уонна СӨ үтүөлээх артыыһа, Сахациркэ салайааччыта Сергей Расторгуев анаммыт. Уопсай сүбэнэн, сценарий аатырбыт олоҥхоһут, тойуксут, биир дойдулаахтара Устин Нохсоороп «Сылгы Уола Дыырай Бэргэн» олоҥхотугар тирэҕирэн,  оҥоһуллуохтаах дииллэр аммалар. Маны таһынан, Олоҥхо ыһыаҕын көрсө Амма олоҥхоһуттарын, Күннүк Уурастыыраптан саҕалаан, уон олоҥхоһут кинигэтэ тахсара былааннанан, үлэ бара турар.

Пленарнай мунньахха Олоҥхо Ассоциация Сүбэтин чилиэннэрэ, СӨ Ил Дарханын иһинэн үлэлиир “Олоҥхо” Национальнай кэмитиэтин салайааччыта Александр Николаевич Жирков мунньах кыттыылаахтарыгар истиҥ эҕэрдэтин тиэрдэн туран, Ил Түмэн референэ Валентина Бочонина, П.П.Романов аатынан Дьокуускайдааҕы художественнай колледж дириэктэрэ, СӨ ускуустубатын үтүөлээх диэйэтэлэ Кирилл Гаврильев, ХИФУ профессора, доцент, педагогическай наука кандидата Галина Попова-Санаайа, олоҥхоһут, Ил Дархан стипендиата, СӨ үтүөлээх артыыһа Валентин Исаков, Олоҥхо Ассоциация вице-бэрэсидьиэнэ Елена Протодьяконова, СӨ үтүөлээх учуутала, фольклор бэстибээллэрин элбэх төгүллээх лауреата, оһуохайдьыт, тойуксут Александра Артемьева, Амма улууһун Култууратын управлениетын салайааччыта Иван Иванов, ХИФУ доцена, историческай наука кандидата Светлана Петрова, уо.д.а., үгүс киһи тыл эттэ, санаатын үллэһиннэ.

Күн иккис аҥарыгар секцияларынан үлэ ыытылынна. Итиэннэ “Олоҥхо Ассоциацията” өрөспүүбүлүкэтээҕи уопсастыбаннай тэрилтэ тимир уустарын кытта холбоһуктаах сүбэ мунньаҕа, Олоҥхоҕо уһуйууга маастар — кылаастар ыытылыннылар, көдьүүстээх кэпсэтии, санаа атастаһыылара буоллулар.
— Сүбэ-соргу, санаа бөҕөтө этилиннэ.
Аммабыт дьоно-сэргэтэ санааларын сайа этэн, сүргэлэрэ көтөҕүллэн, киирбит этиилэри олоххо киллэриигэ сыал-сорук туруорунан, өссө күүскэ түмсэн, үлэлииргэ бэлэмнэрин биллэрэн, тарҕастылар, — диир Елена Протодьяконова.
“Ыһыах – ньыма! Оҕолорбут сахалыы саҥаралларын, сахалыы токкуйдуулларын, сахалыы оонньуулларын, сахалыы ыллыылларын-туойалларын туһугар… Сахабыт тылын, култуурабытын харыстыыр, араҥаччылыыр, норуот баар буолуутун, сайдыытын кэрэһэлиир ньымабыт буолар!” , — диэн Олоҥхо Ассоциациятын бэрэсидьиэнэ Февронья Шишигина этиитэ, мин санаабар, бу мунньах, бу түмсүү сүрүн ис хоһоонунан буолла.
Түмүккэ мунньах туһааннаах быһаарыы ылынна.

Татьяна МАРКОВА.