Хааартыска: ааптар тиксэриитэ
Сэтинньи 25 күнүгэр «Олоҥхо» дэкээдэтин уонна «Хомус күнүн» көрсө Таатта улууһун И.В. Николаев аатынан Харбалаахтааҕы норуот айымньытын дьиэтигэр кыра оҕотуттан кырдьаҕаһыгар тиийэ мустан, бу дьоро күнү бэлиэтээтибит.
Тэрээһин үөрүүлээх арыллыытын Софья Николаевна Кулачикова-Намылҕа алҕаан арыйда. Ф.С. Аргунов аатынан Тааттатааҕы оҕо ускуустубатын оскуолатын Харбалаахтааҕы салаатын фольклорун салаатын уһуйааччыта Айаал Никитич Быгынанов үөрэнээччилэр доҕуһуолларынан дэкээдэни олоҥхоттон быһа тардан толорон саҕалаата. Ол кэнниттэн үс көлүөнэнэн олоҥхону толоруу буолла.
«Кэскил» оҕо уһуйаанын бэлэмнэнии бөлөҕүн кырачаан олоҥхоһуттара Петр Егорович Решетников-Көһөҥө Бүөтүр «Күөнэ көҕөччөр аттаах күүстээх уохтаах Күн күндүлү бухатыыр» олоҥхотуттан быһа тардан толорбуттарын олус сэргээн, өрө көтөҕүллэн иһиттибит.
ХОК 8 кылааһын үөрэнээччилэрэ, мусукаалынай оскуола фольклор салаатын «Сыккыс» бөлөҕүн, олоҥхоһуттарын толорууларыгар Варвара Алексеевна Парфенова «Арылы Хотун Уот кугас аттаах Кустук Боотур» олоҥхотуттан быһа тардыыны үрдүк таһымнаахтык толордулар.
«Дорҕоон тойук» улахан дьон бөлөҕө «Сүүрэр сулус сырыыта сырыылаах Сыыйылла хара сүүрүк аттаах Аһыныгас санаалаах Айыы Дьураҕастай бухатыыр» олоҥхоттон быһа тардыыны иһитиннэрдилэр.
Хомуска күргүөмүнэн толоруу тэрээһиммит иккис чааһын киэргэттэ, ол кэннэ тэрээһиммитин бары сэлэлии түмсэн оһуохайынан түмүктээтибит. Оһуохайы 8 кылаас үөрэнээччитэ Айсаана Федорова таһаарда. Бу тэрээһин иннинэ оскуолаҕа олоҥхо дьыктаанын суруйдулар. Олоҥхо дьыктаанын аахсыйатыгар оҕолор уонна учууталлар көхтөөх кыттыыны ыллылар.
«Хомус күнүн» көрсө Харбалаахтааҕы үөрэхтээһин холбоһугар «Хомус» бырайыак үлэтин саҕалаата. Бырайыак чэрчитинэн орто оскуола уонна ускуустуба оскуолата холбоһон бииргэ үлэлиибит. Ускуустуба оскуолатын учууталлара маастар-кылаастары ыыталлар, оҕолору, учууталлары хомуска уһуйаллар. Бу бырайыак чэрчитинэн үлэ, үөрэх дьылын устата ыытыллара былааннанар.
В.В.МАКАРОВА, дириэктэри иитэр үлэҕэ солбуйааччы
Дьокуускай куорат полициятын 3-с нүөмэрдээх салаатын учаастактааҕы боломуочунайдара Уус Алдан улууһуттан төрүттээх, урут сууттана сылдьыбыт…
Сахалар төрүт итэҕэлбитинэн, таҥха кэмигэр чуумпутук, сэмэйдик сылдьыахтаахпыт. Ол эрээри, тугу гыныахтаахпытын сиһилии билбэппит. Таҥха…
Бу тэрээһиҥҥэ араас тэрилтэлэр салайааччылара, исписэлиистэрэ уонна анал байыаннай дьайыы кыттыылаахтарын дьиэ кэргэттэрин кыһалҕаларын кытта…
Оскуола саастаах оҕо улахан киһи курдук күҥҥэ үстэ аһыырынан муҥурдаммат. Кини оскуолаҕа сылдьан остолобуойга, чугастыы…
Үөрэҕи уонна билими кэтээн көрөр федеральнай сулууспа иһитиннэрэринэн, оскуоланы бүтэрээччилэр олунньу 1 күнүгэр диэри биир…
Дьокуускайдааҕы полиция 4-с нүөмэрдээх отделын дьуһуурунай чааһыгар биир олохтоох дьахтартан төлөпүөнүн уордарбытын туһунан сайабылыанньа киирбит.…