Олоҥхо күрэһин кыайыылаахтара билиннилэр

Нерюнгри оройуонугар 18-с төгүлүн ыытыллыбыт Олоҥхо ыһыаҕа түмүктэнэр чааһа кэллэ. Ыһыах сүрүн тэрээһинин — олоҥхону толорооччуларга күрэс түмүгүн таһаардылар. Дьэ, кимнээх кыайдылар?

Сергей Местников, бырабыыталыстыба бэрэссэдээтэлин солбуйааччы:
— Таастаахха бүтүн өрөспүүбүлүкэттэн мустан, үс түүннээх күн Омоллоон олоҕун, Дьэргэстэй ыһыаҕын ыстыбыт. Сылтан сыл кыттааччы ахсаана элбээн иһэрэ үөрдэр.
Нуучча норуота түөлбэлээн олорор сиригэр олоҥхобут дуорайбыта, тойукпут дьүрүһүйбүтэ олус кэрэхсэбиллээх. Чахчы дириҥ култууралаах, түҥ былыргы устуоруйалаах норуот диэн итэҕэйдилэр, сөхтүлэр-махтайдылар. Төрүт култуураны иҥэринэн сылдьар дьоммутугар, чахчы ис сүрэхтэриттэн ыалдьар буолан, түүннэри күнүстэри үлэлээбит дьүүллүүр сүбэҕэ махтанабын, — диэн эттэ.
Норуот дьокутааттара анал бириистэри туруорбуттар.
Нерюнгри дьокутаата Александр Кошуков 50 тыһ.солк. суумалаах сэртипикээти Виталий Никифоровка туттарда.
Дьокутаат Олег Марков 7 чааһы быһа олоҥхону умсугуйан истэн олорбутун туһунан кэпсээтэ. Кэнники сылларга Олоҥхо ыһыаҕын таһыма үрдээбитин бэлиэтээтэ. Саха тэлэбиидэнньэтэ 10-тан тахса чаас аһаҕас эпииринэн олоҥхоһуттар толорууларын көрдөрдө. Сорохтор архыыпка уһуллан хаалаллар. Кини бэйэтин бирииһин аан бастакынан толорбут Василина Балановаҕа туттарда.
Дьокутаат Василий Николаев 50 тыһ.солк. суумалаах сэртипикээти эдэркээн Надежда Дьяконоваҕа туттарда.
Оттон Сергей Местников бэйэтин бирииһин — 50 тыһ.солк. сэртипикээти кэскиллээх олоҥхоһут Яна Ньургусоваҕа туттарда.
Афанасий Ноев биһиги олоҥхобут — аан дойду духуобунай баайа буолар диэн бэлиэтээтэ.

Зоя Сысолятина, дьүүллүүр сүбэ бэрэссэдээтэлэ:
— Бачча ыраах кыттар оҕо кэлиэ суоҕа диэн куттааннар, куоракка хааллара сыспыттара. Ол эрээри оҕолор сааскыттан быһа бэлэмнэммиттэрэ. Онон ыраахтан айаннаан, 13 улуустан 80 оҕо, ол иһигэр 14 бөлөх кэлбит.

Ыччакка күрэс дьүүллүүр сүбэтин бэрэссэдээтэлэ Айталина Кузьмина:
— Үс күнү быһа ыччат дьоҥҥо 24 биирдиилээн, 4 бөлөҕүнэн толоруу буолла. Сыллата анал бириис туттарар спонсордарбытыгар махтанабыт. Оҕолор таһымнара сыл аайы тупсан иһэр. Саҥа саҕалааччылар эмиэ бааллар, үүнэн-сайдан иһиэхтэрэ.
Ол курдук, оҕолорго хас да номинациянан бириистэри, анал ааттары уонна биллэр олоҥхоһуттар ааттарынан Анал бириистэри туттардылар. 3 үрдэли Босиков Байдам, 2 үрдэли Амматтан »Оллоон» ансаамбыла ыллылар. 1 үрдэли Чурапчыттан Кристина Максимова ылан, кыайыы өрөгөйүн биллэ.
Ыччаттарга эмиэ анал ааттары, бириистэри туттардылар. 1 үрдэли Сайыына Шамаева, 2 үрдэли Айхал Винокуров, 3 үрдэли Никита Аянитов ыллылар.
»Алроса» тэрилтэттэн ноутбук бирииһи Олоҥхо тыйаатырын артыыската Анастасия Алексееваҕа туттардылар.
Улахан дьоҥҥо бөлөҕүнэн толорууга 1 үрдэли — »Хаҥалас утума» бөлөх, 2 үрдэли — Бүлүүттэн народнай тыйаатыр бөлөҕө, 3 үрдэли Чурапчыттан »Оллоон» ыллылар. »Истээччи биһирэбилэ» анал ааты Ньурбаттан »Уйусхан» бөлөҕү ылла.
Биирдиилээн толорооччуларга 1 үрдэли — Аксиния Степанова, 2 үрдэли — Галина Полускина, 3 үрдэли — Виталий Никифоров ыллылар.
60-тан аҕа саастаах олоҥхоһуттарга 1 үрдэли — Сунтаартан Николай Ефремов, 2 үрдэли — Гаврил Орлов, 3 үрдэли — Николай Дьячковскай ыллылар.

Ангелина Васильева хаартыскаҕа түһэриитэ