Олоҥхо ыһыаҕа: «Амикан» ыалдьыттары ыҥырар

От ыйын 3 күнүттэн Нерюнгри куоракка Олоҥхо ыһыаҕын бырагыраамата саҕаланна.

«Амикан» этнокомплекска сарсыардаттан ардаҕы аннынан кэлии-барыы, эрэпэтииссийэ, хомунуу бөҕө буола турар. Полиция, мэдиссиинэ, атыы-эргиэн үлэһиттэрэ, волонтердар номнуо үлэлии сылдьаллар. Киирэр ааҥҥа суумкаҕын арыйтаран, бэрэбиэркэлииллэр.
Бу хайа үрдүгэр тутуллубут »Амикан» этнокомплекс олус кэрэ көстүүлээх сиргэ турар. Киирээти кытта бырамыысыланнаска үлэлиир, үс этээстээх дьиэ саҕа улахан, баараҕай тиэхиньикэ быыстапката турар. Манан бырамыысыланнай оройуоҥҥа кэлбиккин тута өйдүүгүн. Хаартыскаҕа түһэн хаалыахха сөп. Ойуур быыһынан көбүс-көнө аспаал ыллыктар тыргыллаллар.

Мас сытынан дыргыйар сабыс-саҥа тутуу бөҕө дьэндэйбит. Аал Луук мастаах, Моҕол ураһалаах киин түһүлгэттэн, күнү көрсөр түһүлгэттэн хайалардаах кэрэ көстүү арыллар. Айылҕа кэрэтин көрөн астынарга, хаартыскаҕа хатыырга анал беседкалары оҥорбуттар. Кэлин бу комплекс култуура, туризм киинэ буолар кэриҥнээх.

Норуоттар доҕордоһууларын туоһута

Ыһыах аһыллыытын эрэпэтииссийэлии сылдьаллар. Манна Нерюнгри куорат олохтоохторо, оҕолор, киин улуустартан кэлбит ансаамбыллар бары кытталлар.

Ыһыах аһыллыытыгар Олоҥхо тыйаатыра, Үүнэр көлүөнэ тыйаатыра, Хотугу норуоттар тыйаатырдара, Нерюнгритээҕи куукула тыйаатыра кыттыылаах холбоһук көрдөрүүнү туруоруохтара. Манна олоҥхону, эбэҥкилии нимньакааны холбоон, олус интэриэһинэй туруорууну көрдөрүөхтэрэ. Режиссер — Руслан Тараховскай. Ыһыах туруорууларыгар балтараа-икки тыһыынча киһи кыттыаҕа. Барыта 16 тыһыынча кэриҥэ ыалдьыт кэлэрэ күүтүллэр.
Нерюнгригэ ыытыллар Олоҥхо ыһыаҕар элбэх омук олорор өрөспүүбүлүкэтигэр норуоттар доҕордоһууларын, култуураларын хардарыта байытыһан, иллээхтик олороллорун көрдөрөр улахан бырааһынньык буолуоҕа. Барыта 80-тан тахса тэрээһин ыытыллыаҕа. Улуустартан 26 дэлэгээссийэ кэллэ. Саамай элбэх — сүүстэн тахса киһилээх дэлэгээссийэ Чурапчыттан кэллэ. Тоҕо диэтэр, Чурапчы уонна Нерюнгри оройуоннара доҕордоспуттара 48 сыл буолбут.

Быйылгы ыһыах Улуу Кыайыы 80 сылыгар уонна Саха сирин энэргиэтикэтин киинэ — Нерюнгри куорат төрүттэммитэ 50 сылыгар ананар. Ыһыахха бэлэмнэниини икки сыл инниттэн саҕалаабыттара. Билигин бэлэмнэнии үлэтэ түмүктэнэн эрэр, нерюнгрилэр ыһыах этэҥҥэ ааһарыгар эрэнэллэр.