Олоҥхо ыһыаҕа: Өймөкөөҥҥө «Айыы санаа айана» ыҥырар

Кулун тутар 16-17 күннэригэр Өймөкөөн улууһугар Томторго «Олоҥхо ыһыаҕа өрөгөйдөөх Өймөкөөҥҥө: Айыы санаа айана» научнай-методическай кэмпириэнсийэ ыытыллыаҕа.

Сыл аайы Олоҥхо ыһыаҕа ыытыллар улуустарыгар киэҥ далааһыннаах тэрээһиҥҥэ өрөспүүбүлүкэ талааннаах дьоно анаан мустан сүбэлэһэр, уопут атастаһар, үөрэнэр. Дэлэҕэ да, тэрийээччилэр «хайдах научнай-методическай кэмпириэнсийэ ааһар да, Олоҥхо ыһыаҕа оннук буолар» диэхтэрэ дуо?

Дириҥ ис хоһоонноох кэмпириэнсийэҕэ Амма, Таатта, Мэҥэ Хаҥалас, Үөһээ Бүлүү, Хаҥалас, Чурапчы, уо. д.а. улуустартан ыалдьыттар тэринэн, кулун тутар 15 күнүттэн Өймөкөөннүүр туһаайыыны тутуһуохтара. Кинилэри аара адаар таас хайалар арыаллыахтара, сибиэһэй ыраас салгын илгийиэ, ып-ыраас муус маҥан хаарга чаҕылхай күн сардаҥалара күлүмүрдүү оонньоон айхаллыахтара.

Олоҥхо ыһыаҕар бэлэмнэнии тэрээһинэ икки сиринэн ыытыллыаҕа. Ол эбэтэр улуус киинигэр Уус-Ньараҕа уонна Томторго араас сэминээрдэр, маастар кылаастар ыытыллыахтара, айар кэлэктииптэри көрүү буолуоҕа. Кэмпириэнсийэ 20-чэ хайысханан үлэлиирэ былааннанар. Тэрээһиҥҥж тиийбит араас улуус дьоно сахалыы тэринэн олорор дьиэ кэргэн уйгутун, сүөһү иитиитигэр  тыа сирин бастыҥ хаһаайыстыбаларын уопуттарын үөрэтиэхтэрэ, билсиэхтэрэ. Манна Москва куораттан Арассыыйатааҕы сылгы иитиитигэр идэтийбит тыа хаһаайыстыбатын институтун салайааччыта А.М Зайцевы кытта көрсүһүү буолуоҕа. Тимиртэн уонна мастан оҥоһуктарга, сахалыы таҥас тигиитигэр, ас астыырга, сувенир оҥорорго, сахалыы инструменнарга оонньуурга, фольклор көрүҥнэригэр маастар-кылаастар ыытыллыахтара. Тэрээһиннэр аныгылыы  таас тутуулаах Томтор орто оскуолатыгар буолуохтара. Хас биирдии маастар-кылааһы Томтор нэһилиэгин бас-көс дьоно сүрүннүөхтэрэ.

Саха сирин биллэр учуонайдарын кытта көрсүһүүлэр, атах тэпсэн олорон кэпсэтиилэр: «Өймөкөөн ытык сирдэрэ уонна туризм», «Сахалыы сиэр-туом күннээҕи олоххо», *Чэбдик турук — сахалыы хамсаныылар, сөпкө тыыныы, эмтээх оттор», «Олоҥхо уонна экология», «Олоҥхо педагогиката» уо.д.а олус интэриэһинэй маастар-кылаастар буолуохтара.

Кулун тутар 16 күнүгэр — Өксөкүлээх Өлөксөй төрөөбүт күнүгэр «Ньукулай Кырбаһааҥкын, Өксөкүлээх Өлөксөй — Айыы санаа бухатыырдара» диэн «төгүрүк остуолга» дириҥ ис хоһоонноох кэпсэтии буолуоҕа.

Дьэ, онон ким интэриэһиргээбити Өймөкөөн улууһун олохтоохторо кулун тутар 15 күнүгэр «Тымныы полюһа — Өймөкөөн» туһайыыны тутуһалларыгар ыҥыраллар!