Аммаҕа Олоҥхо ыһыаҕа түмүктэннэ!

Аммаҕа Олоҥхо ыһыаҕа түмүктэннэ!

21.06.2024, 19:15
Бөлөххө киир:

17-с төгүлүн ыытыллар Олоҥхо ыһыаҕа түмүктэнэр кэмэ кэллэ. Амма алгыстаах сиригэр икки күннээх ыһыах ыһылынна, 88 араас тэрээһин ыытылынна, 25 тыһыынчаттан тахса ыалдьыт кэлэн барда.

Ыһыаҕы сабыы үөрүүлээх түгэнигэр, үгэс курдук, толору трибуна киһи муһунна.
Олоҥхо тыйаатыра Күннүк Уурастыырап «Нуоралдьын Кугас аттаах Тойон Дьаҕарыма Бухатыыр» олоҥхотун көрдөрд6. Бу олоҥхону бу ыһыахха үс кэлэктиип — Олоҥхо тыйаатыра, Алтаннааҕы култуура киинэ уонна АГИКИ устудьуоннара туруорбуттара. Онон үс өттүттэн көрүү интэриэһинэй буолла.

Амма улууһун баһылыга Степан Кузьмин:
— Өр кэмҥэ бэлэмнэммит ыһыахпыт түмүктэнэр чааһа кэллэ. 90-ча араас тэрээһин буолла. Аммабытыгар олус элбэх ыалдьыт тоҕуоруһан, ыһыахпытын киэргэттилэр. Холобур, тимир уустарын күрэһэр хаһан да бачча элбэх мустубатах 60 уус кытынна, — диэн туран, баһылык дьонугар-сэргэтигэр, нэһилиэктэр баһылыктарыгар, тустаах министиэристибэлэргэ махтанна. Ыһыах чэрчитинэн, былааҥҥа киирбит 19 эбийиэк, ону таһынан 20-чэ эбийиэк тутуллубут. Онон кылгас кэм иһигэр балысхан сайдыы барбыт. Онтон дьон өйө-санаата төһөлөөх сайдыбыта, өрө көтөҕүллүбүтэ буолуой!

Икки күн устата барбыт күрэстэр саха төрүт култуурата, ийэ тылбыт, үгэстэрбит сүппэттэрин, үйэлэри уҥуордаан, үүнэр көлүөнэлэргэ бэриллэ туралларыгар туһуланан ыытылыннылар.
Ол курдук, Аммаҕа ыытыллыбыт Олоҥхо ыһыаҕын кыайыылаахтара ааттаннылар. Олоҥхоһуттарга «Кылаан чыпчаал» бирииһин оҕолорго Амма Бөтүҥүттэн Сандаара Слепцова (100 тыһыынча солкуобай), ыччаттарга Чурапчыттан Александра Алексеева (300 тыһыынча солкуобай) ыллылар, улахан дьоҥҥо Чурапчыттан Анатолий Христофоров ылан, 700 тыһыынча солкуобайдаах сэртипикээтинэн бириэмийэлэннэ. Хомусчуттарга Кылаан кыайыылаах аатын Ньурбаттан Валерий Платонов ылла. Оһуохайга Үөһээ Бүлүүттэн Розанна Герасимова кыайыылаах аатын ылла.

Кэлэр 18-с Олоҥхо ыһыаҕа Нерюнгригэ Таастаах диэн сиргэ ыытыллыа. Ыһыах Ытык дуоҕатын Амма баһылыга Степан Кузьмин вице-премьер Сергей Местниковка, онтон Нерюнгри оройуонун баһылыга Роман Щегельнякка үөрүүлээх быһыыга-майгыга туттардылар.

Роман Щегельняк:
— Олоҥхо ыһыаҕын үрдүк таһымҥа ыыппыккытыгар, биһиэхэ итэҕэйбиккитигэр махтанабын. Биһиги наһаа баҕарабыт, наһаа кыһаллабыт, ол эрээри бу курдук таһымҥа ыытарбыт уустук буолуо диэн олус долгуйабыт! — диэтэ. «Ис сүрэхпиттэн махтанабын!» — диэн уу сахалыы саҥарбытын, ытыс тыаһынан көрүстүлэр.

Түмүккэ Роман Щегельняк «Кыыс Амма» ырыаны бэрт истиҥник ыллаан саҕалаан, дьон кутун тутта, бука бары тэҥҥэ ыллаһа олордулар, сорохтор харахтара ууланна… Эһиил Нерюнгри Таастааҕар көрсүөххэ диэри!

+1
4
+1
1
+1
1
+1
1
+1
1
+1
1
+1
1
Бары сонуннар
Салгыы
21 июля
  • 28°C
  • Ощущается: 28°Влажность: 39% Скорость ветра: 2 м/с

Сообщить об опечатке

Текст, который будет отправлен нашим редакторам: