Олоҥхо ыһыаҕар айан: «Ыһыккытын илдьэ сылдьыҥ!»

От ыйын 4-5 күннэригэр Нерюнгри оройуонугар Олоҥхо ыһыаҕа ыытыллар. Дьэ, бүгүн-сарсын бу хайысханан массыына бөҕө субуллуо турдаҕа. Онуоха аһыыр, чэпчэтинэр өттүнэн төһө бэлэмнээхтэрий?

Бу трасса өрөспүүбүлүкэ хорук тымыра диэххэ сөп. Тоҕо диэтэр, соҕуруу туһаайыынан бу суолунан эрэ өрөспүүбүлүкэ тас өттүгэр тахсаҕын. Суол туруга үчүгэй, көбүс-көнө аспаал суолунан сыыйылыннаран олороҕун. Ол эрээри аһыыр сир аҕыйаҕа моһуогу үөскэтиэн сөп — нэһилиэнньэлээх пуун бэрт аҕыйах.

Суруналыыстар бөлөхтөрө улахан оптуобуска олорон, сарсыарда эрдэттэн айаннаатыбыт. Паромҥа массыына аҕыйах, онон түргэнник, этэҥҥэ туораатыбыт. Өлүөнэ өрүс күнүгэр эбэ үөһүгэр сылдьар дьоллоох сахалар буоллубут.
Аллараа Бэстээххэ аһаабакка, 130 килэмиэтирдээх сиргэ турар кафеҕа эбиэттиэхпит диэн буолла.
Киирбиппит, киһи тобус-толору, үгүстэр остуолга астарын кэтэһэн олороллор. Киһитэ суох остуол суох. Син хоп курдук ис барааннаах кафе, илии суунар сирдээх. Биир үлэһит дьахтар каассаҕа туран, сакаас ылар, онтон официантка курдук остуолга илдьэн биэрэр. Бэрт бытаан, сыһыана хаҕыс. Ким эрэ кэтэһэ сатаан баран, саҥарсаары гыннаҕына, саба саҥаран кэбиһэр.

Онтон сүүрбэччэ киһини көрөн туран: »У нас готовых блюд нет, ждите 40 минут, идите гуляйте», — диэн буолла. Куукунаҕа баран, сүтэн хаалла. Чэй да кутар киһи суох.
Дьиҥэ, каассаҕа атын киһи, аһы таһарга атын үлэһит буолуон сөп курдук, оччоҕо түргэтиэ, саатар чэй кутан биэриэ, уу, бэчиэнньэ, бэрэски атыылыан сөп этэ. Итии чэй испит, бэрэски сиэбит киһи син үссэммит саҕа сананар буоллаҕа. Бу күннэргэ эрдэттэн бэрэскини баҕас бэлэмнээн кэбиһиэхтэрин сөп эбит.

Куукунаҕа баран, кэпсэттим. Биир дьахтар уонна эр киһи ас астыы, иһит сууйа сылдьаллар.
— Өрөспүүбүлүкэтээҕи улахан тэрээһин буолуохтаах, онно эрдэттэн ас астаан бэлэмнэммэтигит дуо?
»Туох буоларый?» диэн бэйэбиттэн ыйыталлар. Билбэттэр эбит.
— Бүгүн, сарсын манан сүүһүнэн массыына, тыһыынчанан киһи ааһыаҕа, онно тоҕо бэлэмнэммэтигит?
— У нас всегда много народу. И что? Сидят, ждут. Мы даже закрываемся, если много народу. У нас клиентов хватает!

Айанньыт бириэмэтэ мэлдьи ыгым буолар. Аһыам этэ диэн, таах мээнэ 40 мүнүүтэ ас астанарын кэтэһэн туруохпут дуо? Аны каассаҕа төлөтөллөрүн, ас аҕалалларын, аһыыргын аахтахха, икки чааһыҥ барар. Онон салгыы атын чайной кэлиэр диэри тулуйарга сананан, сорохтор сарсыарда аһаабатах буолан, хам аччык салгыы айаннаатыбыт.
Бу кафе аттыгар таһырдьа хаадьаҥныы турар тимир туалет баар, кирдээх. Ыксаабыт киһи киирэр.

Салгыы Улуу үрэх үрдүгэр баар кыра бөһүөлэккэ кафе үлэлээбэт эбит.

Бу курдук Үөһээ Амманы ааһан баран, биир кафе сабыылаах, өссө биир кафеҕа эмиэ ас буһарын чаас курдук кэтэһиҥ дииллэр. Уратыта диэн, үлэһитэ эйэҕэс. Дьон кэтэһэн олорор. Онон Томмокко диэри, аһаабакка айаннаатыбыт.

Өймөкөөн улууһугар буолбут Олоҥхо ыһыаҕар суолга балааккалаах кафе тэрийэн, шашлыктаан, хорчуоппа курдук дьону аһаппыттара бэрт этэ диэн суруналыыстар ахталлар.

Онон, ыһыахчыттар Аллараа Бэстээххэ остолобуойга тото-хана аһаан кэлиҥ, ыһыккытын илдьэ сылдьыҥ диэн сүбэлиибин.

Ангелина Васильева.
Ааптар түһэриитэ.