Олоҥхо ыһыаҕар айан: Ырбайбыт ыт, »хаардаах» хайа…

Нерюнгри оройуонугар буолуохтаах Олоҥхо ыһыаҕар эрдэттэн тиийээри, от ыйын 2 күнүгэр хайы-үйэ массыыналар субустулар. Хайдах айаннаан тиийэр туһунан салгыы сырдатабын.

Томмокко диэри хас да кафены аастыбыт эрээри, астара суох буолан биэрдэ. Чаас кэриҥэ ас букатын кэтэстэххинэ биирдэ, аһыыр үһүгүн. Онон сарсыарда 8 чааска паромҥа киирбит буоллахпытына, күнүс 4 саҕана Томмокко кэлэн, аһаатыбыт.
»Ника» диэн остолобуой-кафеҕа ас арааһа тардыллан турар, уочарат да суох. Үлэһиттэр эйэҕэстэр. Манна 5 мөһөөхтөн тахсаҕа аһыыгын. Парола суох босхо вайфайга холбонуохха сөп. Терминал бэркэ үлэлиир.

Таһырдьа төлөбүрдээх туалет, душ, бэл, таҥас суунар сир баар эбит. Таҥас сууйар массыыналар ньиргиччи үлэлии тураллар. Ыраах айан суоппардарыгар абыраллаах сир эбит.

Томмоттор ыһыахха син бэлэмнэммиттэр дуу дии санаатым. Маҕан ытын инники олбоххо олордубут, массыыналаах киһи: »С праздником!» диэн эҕэрдэлээн ааста. Бэл, ыта кытта ырбайан, мичээрдииргэ дылы…
Өрөмүөннүү сылдьар аҕыйах учаастактарыттан ураты, Нерюнгригэ диэри суол аспааллаах, онон айанныырга бэртээхэй. Соҕурууҥҥу Саха сирэ айылҕата да ураты, хайалары, хайыр таастаах хочолору, Амма, Алдан, Чульман курдук улахан өрүстэри, аата-ахса суох үрэхтэри ааһаҕын.

Нерюнгри оройуонун кыраныыссатыгар алаадьы ууруохпут диэн тохтоотубут эрээри, анал бэлиэ суох эбит. Бу трасса саамай үрдүк сирэ, сыыйа эниэ устун аллараа түһэҕин. Үөһэттэн кэрэ көстүү аһыллар. Халтарааҥҥа улахан массыыналар дабайаллара сэрэхтээх үһү. Хайаларга үп-үрүҥ хаар дуу, испиэскэ дуу ыраахтан маҥхайарын сөҕө көрдүбүт. Хайа эниэтигэр даллаахтаан түспүт аарыма хоптолору санатар. Бу учаастакка суол өрөмүөннэнэр буолан, быыллаах, нэксиэлээх.

Иллэрээ сыл Үөһээ Бүлүү кыраныыссатыгар ыһыахчыттары көрсүбүттэрин санаан кэлэбин. Анал бэлиэ туруоран, былакааттары ыйаан, бэл, хаартыскаҕа түһэр зоналары оҥорон, түптэлээн, алаадьынан, быырпаҕынан күндүлээн, бэркэ көрсүбүттэрэ… Манна оннук сир сыта да суох.

Дьэ, Нерюнгри куоракка киэһэ 9 аҥаар чаас диэки тиийдибит. Киэһэнэн ардах түстэ. Кэлэр күннэргэ эмиэ ардахтыыр дииллэр. Онон ыһыахчыттар халыҥнык таҥнан, ардах хотуппат таҥаһынан хааччынан, кумааҕы харчылаах кэлэргит ордук. Сибээс, интэриниэт мөлтөх буолара күүтүллэр. Холобур, Томмокко диэри сибээс олох суох этэ.
Нерюнгри чугаһыгар, хайа үрдүгэр Таастаах диэн ураты кэрэ айылҕалаах сиргэ Олоҥхо ыһыаҕа кэтэһэр.

Урут Алдан оройуонугар буолбут Олоҥхо ыһыаҕа норуоттар доҕордоһууларын, култуураларын бырааһынньыгын курдук өрө күүрүүлээхтик ааспытын өйдөөн кэлэбин. Онон Нерюнгригэ да үчүгэйдик, умнуллубаттык ааһыаҕар саарбахтаабаппын.

Ангелина Васильева.
Ааптар түһэриитэ.