Бу күннэргэ Олоҥхо ыһыаҕар Өймөкөөҥҥө айанныыр массыыналар Томтор туһаайыытын тутуһан, айаннаан эрэллэр. Биһиги массыынабыт киин куораттан бэс ыйын 28 күнүгэр туруммута. Үөрүөхпүт иһин, парому өр кэтэспэтибит, холкутук киирэн хааллыбыт.
Пароммут аҕыйах түгэн иһигэр туолан хаалла.
Холкутук айаннаан 11.30 чаас диэки Алдан өрүскэ кэллибит. Паром туолан турар эбит. Хата, биир миэстэ баар буолан, эмиэ холкутук киирэн хааллыбыт. Хоҥуннубут. Улахан массыыналар аттыларыгар өрүс пуордун үлэһитэ пуормалаах эдэр киһини көрсөн кэпсэттим. Кэбээйиттэн сылдьар Өрүс пордун үөрэҕин кыһатыгар 5-с кууруска үөрэнэр Артем Рехлясов эбит. Эдэр киһи кэпсииринэн, биһиги иннибитигэр толору дьонноох биэс оптуобус паромҥа киирэн ааспыт. «Күнү быһа 5-тэ сырыттыбыт. Паромнар бары толору айаннаатылар», — диэн кэпсиир Артем. Дьон эрдэттэн айаннаан иһэллэрин туһунан сэрэтэллэр эбит. Оччоҕо миэстэ уураллар. Онон миэхэ эмиэ «туһанаар» диэн нүөмэрдээх визиткатын биэрдэ.
Айан дьоно кэпсэтэн билсэр буоллахпыт. Олохтоох таксист Хаҥаластан иһэр илдьэ иһэр дьонун кытта кэпсэттим. Дьонум «Хайс» массыынаҕа толору айаннаан иһэллэр эбит. 4 саастаах кырачаан киһиттэн 75 саастаах эбээҕэ тиийэ айаннаан иһэллэр. Кырачаан киһичээн да, аҕам саастаахтара да, ыраах айаны бэркэ тулуйан иһэллэр эбит. Суоппардара Уус Ньараҕа уһун айаҥҥа таксистыыр эдэр киһи. Бэйэтэ Уус Тааттаттан сылдьар эбит. Дьонун 7 тыһ. солкуобайга илдьэ иһэр. Сыананы наһаа ыараппыт кэмнэригэр, бу эдэр киһи биһиги кэммит дьоруойа буолан көһүннэ. «Маладьыас, сыанаҕын үрдэппэтэххин дии», — диэбиппэр, «Эс, хайдах аан бастакытын ыраах ыалдьыттыы баран иһэр дьоҥҥо сыана ыаратыахпыный? Тиийэн Өймөкөөнү көрөн, айылҕалыын алтыһан кэллиннэр ээ» диэн эттэ. Бэйэтэ хаартыскаҕа түһэртэн кыккыраччы аккаастанна.
Мин суоллааҕы аргыстарбын кытта кэпсэттим.
Хаҥаластан аймаҕынан мустан иһэллэр эбит. Онно өссө дойдуларыгар Томторго сылдьыбатахтара ырааппыт аҕас-балыс Анна уонна Лида Парфеновалар кыттыспыттар. Эйэлээх аргыстар 75 саастаах эдьиийдэрин «салгын сии таҕыста, баран кэпсэт» диэн ыйан ыыттылар. Кинини булан анаан кэпсэттим.
Ити курдук, ыраах айаҥҥа туруммут Олоҥхо ыһыаҕын ыалдьыттарын кытта бастакы билсиһиим уонна кэпсэтиим саҕаланна.
Хаартыскалар уонна видео Елена Потоцкая түһэриилэрэ, устуута
Өрөспүүбүлүкэтээҕи "Оһуокай" түмсүү Дархан этээччитэ Лариса Николаевна оскуола үөрэнэччилэрин дьарыктаабыта ыраатта. Туйах хатарааччылаах бастыҥ этээччибит…
Айсен Николаев Олоҥхо тыйаатырын Саха сирин норуоттарын култуурунай баайын эбийиэгинэн билинэр туһунан Ыйаахха илии баттаата.…
Дьокуускайга 4 №-дээх полиция отделын дьуһуурунай чааһыгар дьахтар суумкатын уордарбытын туһунан сайабылыанньа суруйбут. Кини киин…
Алааска, тыаҕа сылдьан хаһыытыыры, улаханнык айдаарары боболлорун билэргит буолуо. Ону таһынан өссө тугу сэрэтэллэрий, өйдөтөллөрүй?…
Айсен Николаев Судаарыстыбаннай Мунньахха (Ил Түмэҥҥэ) туһаайан этиитигэр дьиэ кэргэннээх үлэһиттэри өйүүр миэрэлэри олоххо киллэрэргэ…
Үгүс үбүлүөйдээх тэрээһиннэринэн баай Өлүөхүмэ улууһун 1-Нөөрүктээйитээҕи модельнай бибилэтиэкэҕэ, ааспыт нэдиэлэҕэ сылы түмүктүүр тэрээһин буолан…