Дьэ, дьикти! Олоҥхо ыһыаҕар алгыс кэмигэр күн көрөн кэллэ

От ыйын 4 күнүгэр Нерюнгри куорат үрдүнээҕи хайаҕа баар Таастаах сиригэр «Амикан» этнокомплекска Олоҥхо ыһыаҕын үөрүүлээх аһыллыыта буолла.

Аан бастаан бу дойдуга тыһыынчанан сылларга тоҕуоруһан олорбут эбэҥкилэр аҕа уустара тахсан, ытык сиэри-туому толордулар. Алгысчыт аал уоту аһатан, сир-дойду иччилэриттэн көрдөһөн, алҕаата. Муус-маҥан таҥастаах дьахталлар түптэ буруолатан, хатыҥ лабаатынан сапсынан, арчылыыр, ыраастыыр туому толордулар.

Дьэ, доҕоттоор, дьикти диэн манна буолла. Алгысчыт Виталий Очиров намыын, холку куолаһынан Сиэл Намылҕа Аартыгы арыйан, Айыылары ааттаталаан, Аал уотун аһатан, алгыс тылларын этэр кэмигэр сарсыардаттан ибирдии турбут ардах тохтоон, көрөн турдахха, халлаан оройунан аһыллан, аламай күн көрөн кэллэ! Айыылар ылыннылар, мичик гыннылар, алгыс көтөҕүлүннэ! Тускуо!

Күн көрбүтүгэр, туос ураһалар уонна туому толорооччулар үрүҥ таҥастара ыраахтан сандааран көһүннэ. Дьиктитэ диэн, ол кэнниттэн күн эмиэ былыкка киирэн хаалла, онтон театрализованнай көрдөрүү бүтэн эрдэҕинэ, ардах эмиэ ибирдээн барда.

Ырыаһыттар Ульяна Петрова уонна Лэгэнтэй, «Соловушка» хор Нерюнгри гимнин өрөгөйдөөхтүк толорбуттарын дохсун ытыс тыаһынан көрүстүлэр.
Салгыы Олоҥхо тыйаатыра, Үүнэр көлүөнэ тыйаатыра, Аҕыйах ахсааннаах хотугу норуоттар тыйаатырдара, Нерюнгритээҕи куукула тыйаатыра кыттыылаах «Аҕыс иилээх-саҕалаах…» диэн туруорууну көрдөрдүлэр. Режиссер — Руслан Тараховскай.

Туруорууга 200-тэн тахса артыыс, ону таһынан, үҥкүү кэлэктииптэрэ, тыһыынчанан оҕолор кытталлар. Эрэкэ-дьэрэкэ оҕолор, кэрэ чэчиктэр, Дьөһөгөй оҕолорун уонна табалар сүрдээх тэтимнээх үҥкүүлэрэ олус маассабай уонна сиэдэрэй буолла. Манна «аттар» уонна «табалар» сыыртан сүүрэн түһэллэрэ олус тэтимнээх, өрө көтөҕүллүүлээх буолла.  Көрөөччүлэр тэҥҥэ өгдөҥнөһө, ыһыытаһа олордулар.

Саха уонна эбэҥки норуоттарын эпостарын холбоон, бэрт интэриэһинэй туруорууну көрдөрдүлэр. Олоҥхо сиэринэн, Айыы бухатыыра орто дойдуну быыһыыр, харыстыыр аналын ылынар. Манна эбэҥки эпоһын ньимньакаантан уобарастар киирэн биэрбиттэр. Саха бухатыыра уонна эбэҥки хоһууна аллараа дойду дьаалытын утары охсуһарга илии тутуһаллар.
Үс түүннээх күннээх улуу кыргыһыы буолар. Хотторон иһэннэр, бухатыыр ата уонна хоһуун табата Айыылартан өлбөт мэҥэ уутун араҕас илгэни көрдөһөллөр. Олоҥхоҕо курдук, үтүө кыайар. Саха боотуругар уонна эбэҥки хоһуунугар хардарыта кэрэ кыргыттарын ойох биэрэллэр, уруурҕаһаллар. Ытык хайалар туралларын тухары, улуу өбүгэлэр хааннара тымырдарга сүүрүгүрэрин тухары тулхадыйбат эйэ туругуруо! Бу туруоруу үйэлэр тухары эҥэрдэһэн олорбут норуоттар доҕордоһууларын көрдөрөр.
Бу кэнниттэн ыһыах Ытык Дуоҕатын Ил Дархан туруорда.

Ил Дархан Айсен Николаев:

— Үйэ аҥаарын анараа өттүгэр ыччаттар мустан, аар тайҕа ортотугар мааны куораты тутан дьэндэппиттэрэ улуу Арассыыйа киэн туттуута буолла. Ытык Таастаах сиригэр Олоҥхо ыһыаҕын, өрөспүүбүлүкэтээҕи сүҥкэн тэрээһини ыытарга эппиэтинэс ылынан, үлэлии сылдьаргытыгар, үтүө сыһыаҥҥытынан үтүөкэн бырааһынньыгы бэлэхтээбиккитигэр махтанабын. Бүгүҥҥү күҥҥэ или, эйэни түстүүр, норуоттары түмэр ыһыахтар хаһааҥҥытааҕар да наадалар, — диэн эттэ.

Нерюнгри оройуонун баһылыга Роман Щегельняк сахалыы, эбэҥкилии эҕэрдэлээтэ, ыһыах этэҥҥэ ааһарыгар баҕарда, ыалдьыттарга махтанна. Олоҥхо ыһыаҕын аһыллыыта добун оһуохайынан түмүктэннэ.