Олоҥхо ыһыаҕар икки култуура дьиэтин тутуохтара

Амма улууһугар 2024 сылга Олоҥхо ыһыаҕа ыытыллар. Онно бэлэмнэнии үлэтэ номнуо ыытыллар. Ол курдук, “Тыа сирин кэлим сайыннарыы” судаарыстыбаннай бырагыраама чэрчитинэн, 2023 сылга улууска икки култуура дьиэтин тутуу саҕаланыа. Бу туһунан култуура, духуобунай сайдыы миниистирэ Юрий Куприянов иһитиннэрэр диэн СИА суруйар.

— Судаарыстыбаннай бырагыраама чэрчитинэн, Амма улууһугар Алтан уонна Соморсун сэлиэнньэлэригэр култуура дьиэлэрин тутан саҕалаатыбыт. 2024 сылга Олоҥхо ыһыаҕар бүтэрэ сатыахпыт, — диэн миниистир Юрий Куприянов эттэ.

Ону тэҥэ, быйыл Устин Нохсоров аатынан Абаҕатааҕы духуобунас киинигэр хапытаалынай өрөмүөн үлэтэ саҕаланна. Бу манна “Култуура” национальнай бырайыактан уонна федеральнай бүддьүөттэн барыта 18,2 мөлүйүөн солкуобай үп көрүллүбүт. Бу мантан 16,6 мөлүйүөн солкуобай федеральнай бүддьүөттэн төлөнөр. Хапытаалынай өрөмүөнү бу сыл балаҕан ыйыгар диэри бүтэрэр былааннаахтар.