Олоҥхо ыһыаҕар олорор, сылдьар усулуобуйа хайдаҕый?

Бу күннэргэ Нерюнгри куоракка ыраахтан-чугастан дьон-сэргэ тоҕуоруста. Олоҥхо ыһыаҕар олорор, сылдьар усулуобуйа хайдаҕый?

»Амикан» этнокомплекс куораттан син тэйиччи, хайа үрдүгэр турар. Онно маршрутнай оптуобустар сылдьаллар.
Иһирдьэ киирдэххэ, ыйынньыктар элбэхтэр. Аспаал ыллыктар тыргыллаллар. Полиция патруллара хаамсаллар, киирэргэ хас биирдии киһини бэрэбиэркэлииллэр. Хас да сиргэ Нерюнгри киин балыыһата тэрийбит медпууннара номнуо үлэлии тураллар.

Киирэр сиртэн чугас »Айгуль» хампаанньа балааккаҕа маҕаһыын арыйбыт. Бородууктаны, хаһаайыстыбаннай маллары атыылыыллар. ‘‘Сыананы олус үрдэппэтибит. Мантан наадалааххытын булан, атыылаһыаххытын сөп. Маҕаһыыммыт сарсыарда 8 чаастан киэһэ уон чааска диэри үлэлиэҕэ. Төлөбүрү кумааҕы харчынан уонна каартанан ылабыт. Онно анаан боруобатынан интэриниэт холботтубут. Ыалдьыттары көрсөргө бэлэммит, ыһыахха үөрэ-көтө сылдьалларыгар, наадыйалларын булалларыгар көмөлөһүөхпүт’‘, — диэн маҕаһыын үлэһитэ Юлия кэпсээтэ.

Оттон чэпчэтинэр сирдэрэ хайдаҕый? Сабыс-саҥа, тупсаҕай көстүүлээх, туспа будка курдук турар туалекка киирэбин. Бай, манна куорат туалеттарыттан итэҕэһэ суох эбит. Ууну носуос хачайдыыр. Сабыс-саҥа раковина, унитаз, убаҕас мыыла, туалетнай кумааҕы, илии соттор кумааҕы — барыта баар. Бэл, сыты тупсарар дезодорант турар. Сарсын, өйүүн тыһыынчанан киһи сырыттаҕына, тулуһар ини диэн эрэниэххэйиҥ.

Нэһилиэктэр, түмсүүлэр түһүлгэлэрин туалеттара мас эрээри, иһирдьэ илии суунар сирдээх эбит.

Икки тыһыынча кэриҥэ кыттааччы кэлбит. Үгүстэрин оскуолаларга, гостиницаларга түһэрдилэр. 13-с нүөмэрдээх оскуолаҕа 600 кэриҥэ киһи түстэ. Бары хомуллар раскладушкаҕа сыталлар, бэйэлэрэ утуйар таҥас, мөһөөччүк илдьэ кэлбиттэр. Эр дьон спортивнай саалаҕа сиргэ, мааттарга сыталлар. Үчүгэйэ диэн, элбэх киһи киирэр душтаах, этээс аайы уу иһэр »кулердар» тураллар, остолобуойдаах. Онон үрдүттэн сылдьан, толуонунан аһыыллар. Астара тотоойу.

Ардахтаах буолан, балааккаларга түһэр уустуктардаах. Сибээс олох мөлтөх. Онон көрө-истэ кэлбит дьон хонор сирдэрин эрдэттэн быһаарынан кэлэллэрэ ордук.

Ангелина Васильева хаартыскаҕа  түһэриитэ