Олоҥхо ыһыаҕын аһыллыытын туруоруута бэрт сэргэх буолла

Үрүҥ таҥастаах Далбар хотуттар түптэ буруотун унаарытан, түһүлгэни ыраастаабыттарын кэннэ, Ил Дархан Айсен Николаев арыалдьыттарын, ыраахтан ыҥырыылаах ыалдьыттары кытта түһүлгэҕэ киирдилэр.

Ыалдьыттар истэригэр Бастакы космонавт сиэн балта, Юрий Гагарин аатынан мемориальнай түмэл-заповедник куратора, Наталья Гагарина, Красноярскай кыраайтан Дьэһиэй бөһүөлэгин баһылыга Галина Боотулу, олоҥхоһуттар, сэлэлээн киирдилэр.
Олоҥхо ыһыаҕар алгыс түстэ! Дьон атахтарыгар туран, илиилэрин үөһэ уунан, нөрүөн нөргүйэн, алгыһы ыллылар.
Күнэ да чаҕылыйан туран биэрдэ, салгына да сөрүүн. »Сылгы Уола Дыырай Бэргэн» олоҥхонон туруоруу саҕаланна. Үүт маҥан үрүмэччи маҥан биэ кынатынан сапсынан, үрүҥ сиэлэ өрүкүйэн көтөн кэлбитин, көрөөччүлэр сөҕө-махтайа көрүстүлэр. Биэ бухатыыр оҕону төрөтөр. Кыһыл көмүс куйахтаах Дыырай Бэргэн абааһы уолун кытта охсуһар. Абааһы уола хотторон, наһыылкаҕа тиэллэн тахсыбытын, Айыы бухатыыра көмүс куйаҕа, ыҥыыра күлүмүрдээн, атынан түһүлгэни эргийэ сүүрдүбүтүгэр, көрөөччүлэр уруйдуу-айхаллыы көрүстүлэр. Хайдах эрэ Айыы бухатыыра күн дьонун көмүскүү, араҥаччылыы кэлбитин курдук көһүннэ.

Дыырай Бэргэн уонна Айталын Куо таптаһаллар, анал кырааҥҥа салгын гимнастара буолан, кыырайа көттүлэр, кый үрдүккэ эргийэ сылдьан, таптал үҥкүүтүн үҥкүүлээтилэр.
Сергей Расторгуев салайааччылаах Саха цииркэтин артыыстара, акробаттар, жонглердар, клоуннар, гимнастар туруорууну киэргэттилэр. Бухатыыр уол түмүгэр эргийэ турар улахан да улахан көлүөһэҕэ ыстаҥалаан көрдөрдө. Олоҥхону уонна цииркэ ускуустубатын ситимнээн көрдөрдүлэр. Туруоруу бэрт тэтимнээх, сэргэх буолан, биир тыынынан көрүллэр.
Көрөөччүлэр тэбис-тэҥҥэ хаһыытаһа, кыайдахтарына, күлэ-үөрэ, уруйдаһа, ытыстарын таһына олордулар. Бу курдук артыыстар уонна көрөөччүлэр биир тыыннаммыттарын өссө көрө илик этим.

Дьэ, Айыы дьоно хара дьайдары кыайдылар, эйэлээх олох эргийдэ, саргы-дьаалы салалынна, өрөгөйбүт үрдээтэ!

Түмүккэ, Ил Дархан Айсен Николаев 17-с Олоҥхо ыһыаҕын Ытык дуоҕатын туруорда.