Олоҥхо ыһыаҕын тэрийэр кэмитиэтин көһө сылдьар сүбэ мунньаҕа буолла

Бүгүн, олунньу 17 күнүгэр, Өймөкөөн улууһун Томтор нэһилиэгэр быйыл от ыйын саҥатыгар ыытыллар Олоҥхо ыһыаҕын тэрийэр кэмитиэтин көһө сылдьар мунньаҕа буолла.

Тэрээһиҥҥэ Ил Түмэн спикерэ, СӨ Олоҥхо ыһыаҕын иккис Уон сылын бэлэмниир уонна тэрийэр Национальнай тэрийэр кэмитиэтин бэрэссэдээтэлэ Александр Жирков, СӨ Бырабыыталыстыбатын бэрэссэдээтэлин солбуйааччы, Өймөкөөҥҥө ыытыллар Олоҥхо ыһыаҕын тэрийэр кэмитиэтин салайааччыта Сергей Местников, Ил Түмэн дьокутаата Сахамин Афанасьев, айылҕа харыстабылын уонна экология, предпринимательство уонна туризм миниистирдэрэ, култуура, үөрэх, доруобуйа харыстабылын, инновация уонна сибээс, тыа хаһаайыстыбатын, ОДьКХ миниистэрдэрин солбуйааччылара, биэдэмистибэлэр эппиэттээх үлэһиттэрэ, эбийиэктэри тутар бэдэрээччиттэр туох үлэ ыытылларын ырыттылар, сүбэлэстилэр.

Сүбэ мунньахха эппиэттээх салайааччылар бэйэлэрин хайысхаларынан ыытыллар үлэни билиһиннэрдилэр уонна үлэ түмүктэнэр чопчу болдьохторун ыйдылар.
— Олоҥхо ыһыаҕын тосхоло, эмблемата, бэлиэлэрэ бигэргэннилэр. Ыһыах култуурунай бэлэмигэр өрөспүүбүкэтээҕи Олоҥхо Ассоциацията, култуура Арктическай института, култуура кэллиэһэ, Үүнэр көлүөнэ тыйаатыра, Норуоттар доҕордоһууларын дьиэтин артыыстара кыттыыны ылыахтара. Барыта 150 идэлээх артыыс кыттара былааннанар. Маны таһынан, Олоҥхо ыһыаҕын аһыллыытын уонна сабыллыытын сиэригэр улуус оскуолаларыттан 200 оҕо кыттыаҕа. Кинилэр Өймөкөөн нэһилиэгэр лааҕырдарга олорон ыһыах аһыллар уонна сабыллар сиэрин-туомун бэлэмнэниэхтэрэ. Ыһыахха сүүрбэччэ култуурунай тэрээһин ыытыллыаҕа, — диэн култуура уонна духуобунас миниистирин 1-кы солбуйааччы Афанасий Ноев иһитиннэрдэ.
Улуус баһылыга Иннокентий Сивцев Өймөкөөн оройуонун Томторугар ыытыллар Олоҥхо ыһыаҕын кэнсиэпсийэтин, ис хоһоонун билиһиннэрдэ. Ол кэнниттэн бу суолталаах тэрээһиҥҥэ туох үлэ ыытылларын иһитиннэрдэ. Быйылгы сылга бастакы улахан бэлэмнэнии тэрээһининэн кулун тутар 15-17 күннэригэр ыытыллар научнай-практическай кэмпириэнсийэ буолар. Олоҥхо ыһыаҕар бэлэмнэнии тэрээһинэ икки сиринэн ыытыллыаҕа. Ол эбэтэр улуус киинигэр Уус-Ньараҕа уонна Томторго араас сэминээрдэр, маастар кылаастар ыытыллыахтара, айар кэлэктииптэри көрүү буолуоҕа. Кэмпириэнсийэ 20 хайысханан үлэлиэҕэ.

Өрөспүүбүлүкэтээҕи улахан суолталаах тэрээһиҥҥэ ыалдьыттар «Халыма» федеральнай суолунан кэлиэхтэрэ.
— Ыһыахха кэлбит дьону аан бастаан Хороту күөлгэ көрсүөхпүт. Үүнэр көлүөнэ тыйаатыра «Лаби Дима» диэн испэктээги бэлэмнии сылдьар. Олоҥхо ыһыаҕын көрсө 11 кинигэ
бэчээттэниэҕэ, — диэн улуус баһылыга эттэ.
Салгыы Иннокентий Семёнович Олоҥхо ыһыаҕын тэрээһин боппуруостарын, тутуллар саҥа эбийиэктэр тустарынан кэпсээтэ.

Тэрийэр кэмитиэт мунньаҕар Олоҥхо ыһыаҕар бэлэмнэнии бары боппуруостарын олохтоохтук ырытан, мантан саас үлэ көхтөөхтүк барара саарбахтаммат.