Олоҥхо ыһыаҕын ыалдьыттарын Саппыйа алааска көрсөллөр

Амма улууһугар Олоҥхо ыһыаҕа бэс ыйын 20 күнүттэн саҕаланар. Бүгүн ыалдьыттар, кыттааччылар ыраахтан айаннаан кэллилэр.

Ыһыах ыалдьыттарын бастаан Мэҥэ Хаҥалас уонна Амма улууһун кыраныыссатыгар арыылаах алаадьынан, уохтаах кымыһынан көрүстүлэр. Сарсыардаттан манна Алтан нэһилиэгин уопсастыбаннай түмсүүлэрин актыбыыстара алаадьылаан, айах туттулар. Дьон түптэ сытын эҕирийэн, салама ыйаан, сып-сылаас алаадьы амсайан, санаата көнөн, салгыы айанныыр.

Салгыы мантан чугас, Амма улууһун бастакы нэһилиэгин — Эмис актыбыыстара саха үгэһинэн айах тутан көрсөллөр. Манна саха норуодунай бэйиэтэ, олоҥхоһут Күннүк Уурастыырап төрөөбүт Саппыйа алааһыгар түмэл, суруйааччы ампаара, саҥа балаҕан, айымньытыгар хоһуйбут »Үрүмэччи маҥан атын» скульптурата, »Көлүкэчээнэ», о.д.а. бааллар. Нэһилиэк историятын, суруйааччы олоҕун туһунан сиһилии кэпсииллэр.

Бу курдук Амма дьоно-сэргэтэ ыалдьыттары көрсөр.