Олоҥхо ыһыаҕын ыалдьыттарын сарсыҥҥыттан көрсүөхтэрэ

От ыйын 4-5 күннэригэр Нерюнгри оройуонугар 18-с төгүлүн ыытыллар Олоҥхо ыһыаҕа буолуоҕа. Ыалдьыттары от ыйын 2 күнүттэн көрсөн саҕалыахтара. 

Ыһыах чэрчитинэн 70-тан тахса тэрээһин тэриллиэҕэ, ол иһигэр өрөспүүбүлүкэтээҕи күрэстэр, спортивнай күрэхтэһиилэр, сиэр-туом тэрээһиннэрэ, быыстапкалар, кэнсиэрдэр, туруоруулар, архыып видеоматырыйаалларынан киинэлэри көрдөрүү.

Сүрүн күрэхтэһии бырагыраамата от ыйын 3 күнүгэр киэһэ саҕаланыаҕа уонна үс күн устата барыаҕа.

Бастыҥ толорооччулар — олоҥхоһуттар, оһуохайдьыттар уонна төрүт култуураны илдьэ сылдьааччылар күрэстэһиэхтэрэ.

Бу күн Нерюнгри оройуонун Иенгра нэһилиэгин олохтоохторо кыттыылаах уһуллубут «Злой дух Ямбуя» диэн уус-уран киинэ көрдөрүллүөҕэ.

От ыйын 4 күнүгэр 11 чаастан «Ытык хайалар туралларын тухары, аан дойду эстиэ суоҕа» диэн ыһыах үөрүүлээх аһыллыыта буолар.

Успуорт төрүт көрүҥнэригэр, уус-уран оҥоһуктарга күрэстэр, быыстапкалар буолуохтара.  Ыалдьыттарга былыргы сиэри-туому билиһиннэрихтэрэ.

Судаарыстыбаннай тыйаатырдар испэктээкиллэринэн оҕолорго анал бырагыраама бэлэмнэммит.

Ону тэҥэ биллэр олоҥхоһуттар, ырыаһыттар: С.А. Зверев-Кыыл Уола, С.Г. Алексеев-Уус уола Уустарабыс, Р.П.Алексеев-Бөҕө Арамаан үбүлүөйдэригэр аналлаах тэрээһиннэр ыытыллыахтара. Биллиилээх политическай уонна уопсастыбаннай диэйэтэл Г.И. Чиряев төрөөбүтэ 100 сылыгар анаан төгүрүк остуол ыытыллыаҕа,

Нерюнгри куорат үбүлүөйүгэр анаммыт «Нерюнгри: уруккуттан билиҥҥигэ диэри кэлэр кэм туһугар» стратегическай сессия буолуоҕа.

Төрдүс төгүлүн аан дойду сэттэ тылынан олоҥхону ааҕыы марафона тэриллиэҕэ.

Түмүк тэрээһининэн Олонхо тыйаатырын «Прекрасная Нюнгурмок – матерь эвенкийская, с длинной косой на шесть саженей» диэн театрализованнай туруоруута буолар, Ыһыах үөрүүлээх сабыллыытыгар от ыйын 5 күнүгэр киэһэ 18.00 чааска көрдөрүллүөҕэ.

Маны тэҥэ күрэхтэһиилэр кыайыылаахтарын бириэмийэлээһин уонна 2026 сылга ыытыллыахтаах Кэбээйи  улууһугар Олоҥхо ыһыҕын бэлиэтин – Ытык Дуоҕаны үөрүүлээх быһыыга-майгыга туттарыахтара.

Сиһилии: https://www.sakha.gov.ru/news/7481