Олоҥхо ыһыаҕын Ытык Дуоҕата Кэбээйи улууһугар туттарылынна

Олоҥхо ыһыаҕын үөрүүлээх сабыллыытын иннинэ  «Прекрасная Нюнгурмок — матерь эвенкийская, с длинной косой на шесть саженей» туруорууну көрдөрдүлэр.

Бырабыыталыстыба бэрэссэдээтэлин солбуйааччы, Олоҥхо ыһыаҕын тэрийэр хамыыһыйатын бэрэссэдээтэлэ Сергей Местников 18-с төгүлүн ыытыллыбыт Олоҥхо ыһыаҕа ситиһиилээхтик ааспытын бэлиэтээтэ, Нерюнгри олохтоохторугар, оройуон баһылыга Роман Щегельнякка махталын биллэрдэ.
Үс күн устата буолбут күрэстэр түмүктэрин таһаардылар.
Хомус күрэһэр Бүлүүттэн Айаал Дмитриев Кылаан кыайыылаах буолла. Киниэхэ үрүҥ көмүс хомуһу туттардылар.
Оһуохай күрэһэр Кылаан кыайыылааҕынан Ньурбаттан Розалия Тихонова буолла. Киниэхэ 100 тыһыынча солкуобайдаах сэртипикээт туттарылынна.
Ыччаттарга олоҥхоҕо Кылаан кыайыылааҕынан Мэҥэ Хаҥаластан Станислав Иванов буолла. Киниэхэ 300 тыһыынча солкуобайдаах сэртипикээт туттарылынна.

Улахан дьоҥҥо Кылаан кыайыылаах аатын Чурапчыттан Сусанна Лазарева ылла. 700 тыһыынча солкуобайдаах сэртипикээтинэн наҕараадаланна.
Нерюнгри оройуонун баһылыга Роман Щегельняк Олоҥхо ыһыаҕын Ытык Дуоҕатын эһиил буолуохтаах Кэбээйи улууһун дэлэгээссийэтигэр туттарда.
Роман Щегельняк:
— Нерюнгри сиригэр-уотугар бу күннэргэ бүтүн өрөспүүбүлүкэ түмүстэ. Миигин бу түгэҥҥэ икки өрүттээх иэйии кууста. Биир өттүнэн, этэҥҥэ ааспытынан чэпчээтибит, иккис өттүнэн, туох эрэ чугас, истиҥ, күндү биһигиттэн баран эрэр курдук. Эһигини сайыһа хаалабыт. Икки сыл устата бу ыһыаҕынан олордубут. Ол эрээри Олоҥхо ыһыаҕа хаһан эмит, баҕар, 28 сылынан Нерюнгри оройуонугар төннөрүгэр эрэнэбит, — диэн эттэ.

Оттон Кэбээйи улууһун баһылыгын э.т. Александр Сивцев аныгыскы Олоҥхо ыһыаҕын этэҥҥэ ыытыахпыт диэн эрэннэрдэ. Кэбээйилэр улахан дэлэгээссийэнэн оҥостон-тэринэн кэлбиттэр. Сөп ээ, барытын көрөн-истэн, үөрэтэн барыахтаахтар, эһиилги эппиэтинэс кинилэргэ сүктэриллэр.