Олоҥхоһуттарга, оһуокайдьыттарга уонна уустарга Саха сирин Ил Дарханын истипиэндьийэлэрэ туттарылынна

Айсен Николаев сэтинньи 24 күнүгэр өрөспүүбүлүкэ төрүт култууратын илдьэ сылдьар олоҥхоһуттарга, оһуохай таһаарааччыларга уонна уустарга Саха сирин баһылыгын истипиэндьийэтин аныыр туһунан сэртипикээттэри туттарда.

Өрөспүүбүлүкэ баһылыга дойду Бэрэсидьиэнэ Владимир Путин биллэрбит Арассыыйа норуоттарын култуураҕа нэһилиэстибэлэрин сылыгар өрөспүүбүлүкэҕэ төрүт култуураны сайыннарыыга үтүмэн үлэ ыытыллыбытын бэлиэтээтэ.

“Бүгүн биһиги бастыҥ олоҥхоһуттарга, оһуокайдьыттарга уонна уустарга кинилэр сөҕүмэр талааннарын уонна төрүт култуураларын харыстааһыҥҥа уонна сайыннарыыга кылааттарын бэлиэтээн, истипиэндьийэлэри аныыр туһунан сэртипикээттэри туттарабыт. Бу Арассыыйа норуоттарын култуураҕа нэһилиэстибэлэрин сылыгар өрөспүүбүлүкэ бырайыактарыттан биирдэстэринэн буолар”, — диэн Айсен Николаев бэлиэтээтэ.

Истипиэндьийэлэр сэттэ олоҥхоһукка, сэттэ оһуокайдьыкка уонна сэттэ ууска саха Олоҥхотун чөлүгэр түһэриигэ, харыстааһыҥҥа уонна тарҕатыыга үтүөлэрин-өҥөлөрүн, оҕолору уонна ыччаттары өрөспүүбүлүкэ норуоттарын баай култуурунай үгэстэригэр уһуйууларын иһин  ананнылар.

Олоҥхоһуттартан Саха сирин Ил Дарханын истипиэндьийэтин  Аркадий Захаров (Мэҥэ Хаҥалас улууһа), Василий Иванов – Чиллэҕэ (Ньурба улууһа), Валентин Исаков (Уус Маайа оройуона), Кирилл Никифоров (Үөһээ Бүлүү улууһа), Николай Тарасов (Чурапчы улууһа), Никандр Тимофеев (Сунтаар улууһа), Пётр Тихонов (Мэҥэ Хаҥалас улууһа) ыллылар.

Оһуокайдьыттар Афанасий Алексеев (Бүлүү улууһа), Мария Викторова (Чурапчы улууһа), Михаил Евсеев — Кураһаай Мэхээлэ (Сунтаар улууһа), Анатолий Кривошапкин (Дьокуускай к.), Прасковья Москарова (Үөһээ Бүлүү улууһа), Егор Осипов (Өлүөхүмэ оройуона), Семён Черноградскай (Уус Алдан улууһа)  истипиэндьийэ анаммытын туһунан сэртипикээттэри Ил Дархан илиититтэн туттулар.

Өрөспүүбүлүкэ уустарыттан Ил Дархан истипиэндьийэтин ылар чиэскэ тигистилэр: Ариан Афанасьев (Ньурба улууһа), Василий Герасимов (Нам улууһа), Александр Данилов (Хаҥалас улууһа), Прокопий Ильин (Нам улууһа), Егор Тумусов (Үөһээ Бүлүү улууһа), Александр Михайлов (Нам улууһа).

Уһаныы дьыалатын сайыннарыыга уһулуччу үтүөтүн иһин Саха сирин Ил Дарханын  истипиэндьийэтин биллэр уус, норуот маастара Борис Неустроев-Мандар Уус  (Таатта улууһа) олоҕун устата ылыаҕа.

Былатыан Ойуунускай аатынан өрөспүүбүлүкэ судаарыстыбаннай бириэмийэтин лауреата, СӨ Духуобунас академиятын академига, СӨ култууратын үтүөлээх үлэһитэ Борис Неустроев – Мандар Уус Саха сирин баһылыга Айсен Николаевка төрүт култуура нэһилиэстибэтин харыстааһыҥҥа уонна сайыннарыыга улахан болҕомтотун уурарын иһин истиҥник махтанна. Борис Федорович норуот маастардарын оҥоһуктара, олоҥхоһуттар, оһуокайдьыттар айымньылара дьоҥҥо үтүөнү-кэрэни уонна туһаны аҕалалларыгар баҕарда.  Мандар Уус биир идэлээх уран уустарга кытаанах саха тимирин уһааран, өрөспүүбүлүкэ брендинэн оҥороллоругар ыҥырда.

Олоҥхоһуттарга, оһуокай этээччилэргэ уонна уустарга истипиэндьийэлэр 1 сыл бэриллэллэр. Маны куонкуруһунан сүүмэрдээн, анал хамыыһыйа талар.

Истипиэндьийэ кээмэйэ 30 тыһыынча солкуобайга тэҥнэһэр уонна кэлэр ыйтан ый аайы биир сыл устата төлөнөр.

Санаттахха, Олоҥхо дьиэлэрин биир кэлим ситимин тэрийэр уонна төрүт култуура нэһилиэстибэтин илдьэ сылдьааччыларга истипиэндьийэни олохтуур туһунан ыйаахха Саха сирин баһылыга бу сыл бэс ыйыгар илии баттаабыта.

Ыйаахха сөп түбэһиннэрэн, өрөспүүбүлүкэ судаарыстыбаннай бүддьүөтүгэр айар бырайыактары олоххо киллэриигэ субсидиялары төлөөһүҥҥэ  уонна Олоҥхо дьиэлэрин материальнай-тэхиньиичэскэй баазаларын бөҕөргөтүүгэ 50 мөл солк. кырата суох кээмэйдээх, ону тэҥэ ыйдааҕы истипиэндьийэлэри төлөөһүҥҥэ  7 мөл 560 тыһ. солк. бүддьүөт харчыта сыл ахсын көрүллүөҕэ.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.

Андрей Сорокин түһэриитэ, СИА