«Олоҥхолоох айаны» кэрэхсээтилэр

Горнай улууһун Атамай орто оскуолатыгар сэргэх уонна туһалаах тэрээһин буолла.

Нэһилиэкпит оскуолатыгар «Олоҥхолоох айан: Ноо!» ыччат десанын кыттыылаахтара, култуура уонна ускуустуба Арктикатааҕы институтун талааннаах устудьуоннара, выпускниктара ыалдьыттаатылар.

Өрөспүүбүлүкэ Дархан оһуохайдьыта, СӨ култууратын туйгуна, Олоҥхо ыһыаҕын, Муҥха, Куйуур олоҥхолорун бэстибээллэрин хас да төгүллээх кыайыылааҕа Виталий Никифоров оллоонноон олорон «Дьулуруйар Ньургун Боотур» олоҥхоттон быһа тардыыны оҕолорго толорон иһитиннэрдэ. Маны сэргэ, олоҥхону сэҥээрэр, сэргиир оҕолорго маастар-кылаас ыытылынна.

Онтон култуура уонна ускуустуба Арктикатааҕы институтун устудьуоннара 8-11 кылаас үөрэнээччилэрин кытары көрүстүлэр, үөрэхтэрин кыһатын туһунан кэпсииллэрин оҕолор олус сэҥээрэн иһиттилэр, ыйытыылары биэрдилэр.

Бу күн тэрээһиҥҥэ сылдьыбыт оҕолор, төрөппүттэр, учууталлар туһалаах көрсүһүү, кэпсэтии буолбутуттан олус үөрдүбүт. Маннык тэрээһин сыллата ыытылларыгар баҕарарбытын биллэрдибит, ыалдьыттарбытыгар махтанныбыт.

Александра Ефремова,

Атамай, Горнай.

Ааптар хаартыскаларга түһэриитэ