Олоҥхону туруорууга дьону сүүмэрдээтилэр

Кэбээйи улууһун Ньидьили нэһилиэгэр Арассыыйаҕа Аҕа дойдуну, Саха сиригэр Ийэ дойдуну көмүскээччи, Кэбээйи улууһугар Дойдуга бэриниилээх буолуу сылларын аһыыга нэһилиэк талааннаах дьоннорун уус-уран самодеятельноһын кэнсиэрэ, уус-уран оҥоһуктарын быыстапката туруорулунна.

“Бу дьоро киэһэҕэ Дьокуускай куораттан Арктическай институт уһуйааччылара анаан кэлэн, олоҥхону туруорууга сүрүн оруолларга оонньуур дьону сүүмэрдээтилэр, сүбэ-ама биэрдилэр, маастар-кылаастары ыыттылар. Маны таһынан “Саха” НКИХ-тан кэлэннэр,  тэрилтэлэри кэрийэ сылдьан уһуллулар, киэн туттар дьоммутун кытта кэпсэтэн-ипсэтэн, «Сонуннар» биэриигэ нэһилиэкпит олоҕун сырдатар  матырыйаалы хомуйан бардылар.

Кэнсиэртэн киирбит үп байыаннай дьайыыга сылдьар  ыччаттарбытыгар күүс-көмө, өйөбүл буоллун диэн улууспут Ассамблеятын счетугар ыытыллыаҕа”, — диэн кэпсээтэ “Тускул” култуураны сайыннарар киин уус-уран салайааччыта Альбина Ноговицына.