Олунньу 1 күнүттэн дьиэ кэргэн ипотекатын быраабылата уларыйар

Арассыыйаҕа үүнэр сыл олунньу 1 күнүттэн биир дьиэ кэргэҥҥэ биир эрэ чэпчэтиилээх кирэдьиити биэрэр хааччах киирэр уонна кэргэнниилэр булгуччу иккиэн кирэдьиити тэҥҥэ төлүүр (созаемщик) буолуохтаахтар. Бу туһунан Судаарыстыбаннай Дуума дьокутаата Екатерина Стенякина иһитиннэрдэ.

Өскөтүн кирэдьиити ыларга дохуот тиийбэт буоллаҕына, төрөппүттэр үһүс сирэйдэри кытыннарар кыахтара оннунан хаалар. Дьокутаат этэринэн, дьаһал дьоҥҥо көмө тиһигин ордук сиэрдээх оҥорорго туһуланар.

«Дьиэ кэргэн ипотекатын биэрэр быраабыланы хат көрүү — чэпчэтиилээх кирэдьиити дьон олорор усулуобуйаларын тупсарарга буолбакка, харчыны эргитэр сыаллаах туттар түгэннэрэ элбээбититтэн таҕыста. Саҥа быраабыла дьиэҕэ-уокка дьиҥнээхтик наадыйар дьиэ кэргэттэргэ көмөлөһөр соруктаах», — диэн Стенякина быһаарда. Дьиэ кэргэн ипотеката сүрүннээн саҥа тутуллубут дьиэлэргэ кыбартыыра атыылаһарга бэриллэрин кини санатта.

«Ол эрэн биир уратылаах. Өскөтүн элбэх кыбартыыралаах дьиэлэр тутуллубат сирдэригэр (холобур, кыра нэһилиэктэргэ), инбэлиит оҕолоох ыаллар «вторичканы» (эргэ дьиэни) атыылаһалларыгар чэпчэтиинэн туһаныахтарын сөп. Маннык кирэдьиит ыстаапката 6 бырыһыантан үрдээбэт», — диэн дьокутаат эттэ.

Ааспыт чэппиэргэ вице-премьер Марат Хуснуллин дьиэ кэргэн ипотеката быйыл саамай ирдэнэр бырагырааманан буолбутун иһитиннэрбитэ. Сыл түмүгүнэн 4,1 триллион солкуобай суумалаах 912 тыһыынча ипотека кирэдьиитин биэрэр былааннаахтар, онтон чэпчэтиилээх бырагырааманан 3,3 триллионнаах 562 тыһыынча кирэдьиит бэриллибит.

Маныаха диэри РФ Үп министиэристибэтэ 2026 сыл олунньу 1 күнүттэн хас биирдии кэргэнниилэр тус-туһунан икки чэпчэтиилээх кирэдьиити биэрэр бобулларын туһунан иһитиннэрбитэ — кинилэр иккиэн кирэдьииккэ тэҥҥэ иэс ылааччынан (созаемщик) суруллаллар. Маны таһынан, дьиэ кэргэн, Уһук Илин уонна Арктика ипотекаларын холбоон ылбыт дьон, кирэдьииттэрин ырыынак сыанатынан ааҕыллар чааһын рефинансированиенан баан усулуобуйатынан чэпчэтэр кыахтаныахтара.