Олунньу 13 күнэ – Төрөөбүт тыл уонна сурук-бичик күнэ

Бүгүн, олунньу 13 күнүгэр бастакы сахалыы сурук-бичик алпаабытын төрүттээбит, лингибиис-учуонайа С.А. Новгородов төрөөбүт күнэ уонна Ийэ тыл күнэ. 

Саха сирин бастакы Бэрэсидьиэнэ М.Е. Николаев 1996 сыл олунньу 9 күнүнээҕи 1294 №-дээх «Төрөөбүт тыл уонна сурук-бичик күнүн биллэрии туһунан» Ыйааҕыгар олоҕуран, С.А. Новгородов төрөөбүт күнэ – олунньу 13 күнэ – Төрөөбүт тыл уонна сурук-бичик күнүнэн биллэриллибитэ.

Бу Күн олохтонуута Саха Сирин төрүт олохтоохторун төрөөбүт тылларын сайыннарыыга, бастакы саха суругун-бичигин олохтообут саха лингвист-учуонайа, бастакы саха үөрэҕин кинигэлэрин таһаарааччы Семен Андреевич Новгородов сырдык кэриэһин үйэтитэр, аатын ытыктатар соруктаах.

Бу Күн араас үөрэх кыһаларыгар, култуура кииннэригэр төрөөбүт тылга аналлаах араас тэрээһиннэр ыытыллаллар. Оскуолаларга Саха суруйаачыларын, поэттарын кытта көрсүһүүлэр, араас күрэхтэр, көрүүлэр тэриллэллэр. Өрөспүүбүлүкэ үрдүнэн саха тылыгар анаммыт араас тэрээһиннэр, көрсүhүүлэр киэҥ хабааннаахтык ыытыллаллар.