Олунньу нуорматтан сылаас буолуо, ол эрээри…

Саха сиригэр олунньу ый  нуорматтан сылаас буолуо диэн сабаҕаланар, ол гынан ый бастакы аҥаарыгар сорох улуустарга тымныы күн-дьыл туруоҕа.

Бу туһунан «Якутия 24» ханаалга  «Актуальное интервью» биэриигэ Дьокуускайдааҕы гидрометкиин отделын салайааччыта Саргылаана Никитина эттэ.

Олунньу ыйдааҕы билгэни Дьокуускайдааҕы гидрометкиин Иркутскайдааҕы управлениеттан ылар. Ол билгэнэн, өрөспүүбүлүкэ үгүс өттүгэр салгын температурата нуорматтан 1-2 кыраадыс үрдүк буолуоҕа. Арай соҕуруулуу-арҕаа уонна Халыма-Индигиир улуустарыгар салгын температурата нуорма таһымыгар эбэтэр онтон 1 кыраадыс кэриҥэ намыһах буолуо. Билгэ кэтээн көрүү ньыматыгар олоҕурар.

«Майгынныыр дьыл талыллар. Быйылгы олунньу ыйга майгынныыр сылынан 2025 сыл буолар. Өскөтүн майгынныыр сыл сөпкө талыллыбыт буоллаҕына, олунньу ый урукку сыл олунньутугар майгынныахтаах», – диэн синоптик быһаарда.

Ааспыт сылга Саха сиригэр олунньу сүнньүнэн сылаас этэ. Ол эрээри быйыл, Саргылаана Никитина этэринэн, ый бастакы аҥаара тымныы буолуоҕа.

«Дьокуускай куоракка олунньу ортотугар диэри тымныы күн-дьыл туруоҕа: түүнүн -40-45 кыраадыска диэри, оттон күнүһүн -30-35 диэри тымныйыа. Ый иккис аҥаарыгар түүҥҥү салгын температурата -27-32 кыраадыска диэри «сылыйыаҕа», оттон олунньу бүтэһик күннэригэр -10-15 кыраадыс буолуон сөп», – диэн кини кэпсээтэ.