Олунньу ый түмүктэрэ

Бүгүн Ил Дархан Айсен Николаев «Саха сирэ, иннин диэки!» биэриигэ кыттан, олунньу ый түмүгүн таһаарда.

Ол курдук, бэйэтин санаатын Арассыыйа бэрэсидьиэнэ Владимир Путин Федеральнай Мунньахха этиитигэр үллэһиннэ. Байыаннай сулууспалаахтары өйүүр идиэйэтин сөптөөҕүнэн аахта. Ордук судаарыстыба анал пуондатын тэрийиини биһирээтэ. Арассыыйа дьоно үчүгэйдик олоруохтаахтарыгар туһуланар үлэлэри эмиэ аҕынна.
Патриотическай хайысхалаах олунньу ый ааспытын салгыы бэлиэтээтэ. Аҕа дойдуну көмүскээччи күнэ ураты тыыннаах буолбутун эттэ.
Айсен Николаев байыаннай дьайыы кыттыылаахтарын дьиэ кэргэттэрин кытта көрсүһэрин аҕынна. Онно болҕомто хас биирдии дьиэ кэргэҥҥэ ууруллуохтааҕын ыйда. Оройуон, бөһүөлэк төһө көмөлөһөрүй диэн куруук болҕомтоҕо ылар.
Олунньу ыйга өрөспүүбүлүкэ баһылыга хас да улууска сылдьыбыт. Ордук тоһоҕолоон Нерюнгри оройуонун туһунан кэпсээтэ. Манна бу сырыы түмүгүнэн доруобуйа харыстабылын сайыннарыыга улахан болҕомто туһаайыллыбыт. Барыта этэҥҥэ ыытылыннаҕына бу куорат киин балыыһата толору саҥардыллыахтаах.
Бүлүү улууһугар саҥа балыыһа бастакы уочарата аһыллыыта бэлиэ түгэнинэн буолбут. Ол түмүгэр аныгылыы эбийиэккэ хирургия, уопсай отделение аһыллыбыттар. Атын улуустарга эмиэ бу сыл бүтүөр диэри саҥа эбийиэктэр киириэхтэрэ.
Айсен Сергеевич орто идэтийбит үөрэххэ болҕомтотун туһаайда. Мииринэй кэллиэһин холобурдаата. Бастыҥ кыһаҕа материальнай баазатын тупсарыыга болҕомтону уурарга эттэ. Бу боппуруоска федеральнай таһымтан субъектарга көмө көрүлүннэҕинэ, өрөспүүбүлүкэ эмиэ туора туруо суоҕа диэтэ. Дойдуга оробуочай идэлэргэ каадырдар тиийбэттэрин кыһалҕата уопсай күүһүнэн быһаарыллыахтаах.
Түмүккэ кулун тутар ыйдааҕы тэрээһиннэргэ тохтоото. Табаһыттар чөмпүйэнээттэрэ уо.д.а. ыытыллыаҕа.