Олунньуга дуоллар төһө буолуой?

Олунньуга дуоллар сыаната 73–82 солкуобай, евро — 92–98 солкуобай, юань — 10,8–11,3 солкуобай буолуоҕа диэн «Газета.Ru» Инго Баан сүрүн аналитига Петр Арронет билгэлээтэ.

«Солкуобай кууруһа чугастааҕы кэмҥэ дойду иһинээҕи экэниэмикэ туругуттан уонна сүрүн  ыстаапка уларыйыытыттан тутулуктаныа. Тохсунньуга солкуобай бигэ туруктаах, онно хас да төрүөт баар: ФНБ харчытыттан уонна экспортердар тас дойду валютатын ис ырыынакка атыылааһыннара уонна НДС индексациятын кэмигэр сүрүн ыстаапка уларыйбакка хаалыыта», — диэн Арронет бэлиэтээтэ.

Кини этэринэн, олунньуга валюта кууруһугар дьайар төрүөттэр уларыйыахтара суоҕа. Ол эрээри, ити кэмҥэ тас дойду валютатын сыаната салгыы үрдүүрэ НДС индексацията инфляцияҕа хайдах дьайарыттан тутулуктаах буолуоҕа диир аналитик. Өскөтүн нэдиэлэтээҕи инфляция биир таһымҥа хааллаҕына эбэтэр намтаатаҕына, ол солкуобай сыыйа мөлтүүрүгэр тиэрдиэн сөп.

Тохсунньу 9 күнүгэр дуоллар сыаната 78,3 солк., евро — 91,8 солк., юань — 11,2 солк. тахса этэ. 2025 сыл саҥатыттан дуоллар кууруһа быһа холоон 22,7 солкуобайга (-22,6%), евро — 13,8 солкуобайга (-13,2%), юань — 2,7 солкуобайга (-19,8%) намтаабыт. Ааспыт сылга солкуобай күүһүрүүтэ сүнньүнэн хас да төрүөттэн быһаарыллар: харчы бэлиитикэтэ, кирэдьиит уонна солкуобай үрдүк  ыстаапкалара, ол түмүгэр харчыны валютаҕа уурардааҕар солкуобайынан тутар ордук барыстаах буолбута. Маны таһынан тас дойдулар хааччахтарынан сибээстээн, биирдиилээн дьон өттүттэн валютаҕа наадыйыы аҕыйаабыта, итиэннэ Киин Баан валютатын ырыынагар (ол иһигэр юань нөҥүө) операциялара элбээбитэ солкуобайга үчүгэйдик дьайбыта. Маннык усулуобуйаҕа наадыйыы уонна этии (спрос и предложение) тэҥнэһиитэ солкуобайга үчүгэйдик дьайбыта.