Олунньутааҕы «Чолбон» киэҥ ыырыгар – Орто Азияттан, былыргы Москваттан саҕалаан таас Дьааҥы уонна Муустаах байҕал кытыла

«Чолбон» сурунаал олунньу ыйынааҕы нүөмэригэр кэрэхсээҥ:

— Гаврил Андросов саха уус-уран тылын туһунан бас тылын;

— «Оһох курдук бар дьоҥҥо сылааһы, сырдыгы соболоҥо суох тарҕата сылдьаар», — диэн сэрии кыттыылааҕын алгыстаах тыллара эдэр доҕорун олоҕор хайдах сабыдыаллаабытын уонна олоххо тардыһыы күүһүн туһунан Василий Титов «Улуу Кыайыы айымньылара» рубриканан бэчээттэммит «Оһохчуттар» кэпсээнин;

— норуотун суруйааччыта Василий Назарович Егоров-Тумарча 90 сааһын көрсө биир идэлээхтэрэ геологтар мүччүргэннээх сырыыларын, тайҕа эр дьону тургутуутун туһунан «Ат барахсан», «Сэрэх ийэ», «Өлүү эҥээрдээх…» диэн кэпсээннэрин;

— устудьуон аймах 90-с сыллардааҕы дьалхааннаах кэмнэргэ тус бырааптарын туруулаһыыларын сэргэ, байар-тайар уххаҥҥа оҕустаран түөрэккэй суолга үктэнэллэрин туһунан Константин Эверстов «Сэргэлээххэ сэргэх күннэр» сэһэнин саҥа түһүмэҕин;

— Рустам Каженкин хайдах уулуссаны дьолунан толоруохха сөбүн туһунан «Хоһооммор эн эрэ…» уонна  суруналыыс Геннадий Бечеряков түспэтийбит киһи төрүт түөлбэтин туһунан иэйиилэрин тиспит «Оһох тыаһа, сылааһа — ааспат ахтылҕан тыына…» хоһооннорун бөлөхтөрүн;

— саҥа кэм драматура Утум Захаров былырыын Саха тыйаатырыгар туран бар дьон болҕомтотун тардыбыт «Маһары. Ыраахтааҕыга айан» историялыы пьесатын бастакы түһүмэҕин;

— «Олоҥхо дойдутун айар түмсүүлэриттэн» биирдэстэрэ – Нам улууһун «Отуу уота» литература түмсүүтүн кыттыылаахтара Дайыына Байдам, Аскалон Егоров-Өркөн Дьол,  Надежда Рыкунова-Кыыдаана, Христина Софронова-Сардаҥа, Владимир Федотов-Одун суруйууларын;

— «Биллиилээх суруйааччылар биографияларыгар» норуот суруйааччыта Сэмэн Тумат «Дьуон Дьаҥылы. Литература уонна сэрии инники кирбиитигэр» ыстатыйатын;

— кыраайы үөрэтээччи Илья Колосов өрөбөлүүссүйэ уонна гражданскай сэрии уот холоругар түбэһэн үрүҥ-кыһыл буолбут, Саха сирин историятыгар бэлиэ суолу хаалларбыт «Дьааҥы Новгородовтарын туһунан аҕыйах тылын»;

— Рустам Каженкин билиҥҥи кэм бэлиэ поэта Зинаида Архипова «Көс кут» диэн  икки тылынан тахсыбыт хоһооннорун хомуурунньугун туһунан санаатын үллэстиитин;

— норуот суруйааччыта Сэмэн Тумат төрөөбүт дойдутун – Муустаах байҕал хонноҕор баар биир түөлбэ туһунан «Картаҕа суох Саҕастыыр туһунан уран тыл мэҥэ өйдөбүнньүк» диэн «Чолбон» сурунаал солбуллубат ааптара, кириитик Ольга Макарова сэҥээриитин;

— «Оҕоҕун кытта аах» рубрикаҕа Константин Туйаарыскай «Үчүгэй оҕо. Доҕор» хоһооннорун.

Күн – сири, «Чолбон» – саханы сырдатар.