Олунньуттан олоххо киирэр саҥа сокуоннар

Олунньу 1 күнүттэн Арассыыйаҕа социальнай төлөбүрдэри, туһанааччы быраабын көмүскээһини уонна баан эйгэтин таарыйар уларыйыылар күүстэригэр киирэллэр. Сүрүн саҥа уларыйыылары кытта билиһиннэрэбит.

Социальнай төлөбүрдэр уонна индексация

Олунньу 1 күнүттэн 40-тан тахса социальнай босуобуйа уонна төлөбүр кээмэйэ 2025 сыллааҕы инфляцияҕа сөп түбэһиннэрэн 5,6% үрдүүр. Бу үрдэтии автоматическай буолуоҕа, үп-харчы саҥа кээмэйинэн ааҕыллан түһүөҕэ.

• Ийэ хапытаалын кээмэйэ бастакы оҕоҕо 728,9 тыһ. солкуобайга диэри, оттон иккис оҕоҕо (бастакытыгар ылбатах буоллахха) — 963,8 тыһ. солкуобайга диэри улаатыаҕа. Сороҕун туһаммыт сэртипикээттэргэ хаалбыт үп-харчы эмиэ индексацияланыа.
• Оҕо төрөөтөҕүнэ эбэтэр ииттэ ыллахха биирдэ бэриллэр босуобуйа 28 451 солкуобай буолуоҕа.
• Олунньуга федеральнай чэпчэтиинэн туһанааччыларга ый аайы бэриллэр харчынан төлөбүр эмиэ индексацияланыа. Маннык төлөбүр Аҕа дойду Улуу сэриитин инбэлииттэригэр уонна кыттыылаахтарыгар, өлбүт байыаннайдар төрөппүттэригэр уонна огдооболоругар, судаарыстыбаҕа ураты өҥөлөөх гражданнарга, инбэлииттэргэ, ол иһигэр инбэлиит оҕолорго, ону тэҥэ байыаннай дьайыылар бэтэрээннэригэр бэриллэр.
• Олунньу 1 күнүттэн Арассыыйа уонна ССРС Дьоруойдарыгар, ону тэҥэ Албан аат уордьанын толору кавалердарыгар ый аайы бэриллэр төлөбүр 100 тыһыынча солкуобайтан тахса буолуоҕа.

Туһанааччы быраабын көмүскээһин

Атыылаһааччылар хаачыстыбата мөлтөх, тэхиниичэскэй өттүнэн уустук табаары төннөрөр кэмнэригэр, табаар эргэриитин уоннa оҥоһуллубут сылын учуоттаан, сыанатын толуйтарар бырааптаныахтара. Бу саҥа уларыйыы атыылаһааччыны инфляцияттан эбэтэр сыана үрдээһиниттэн табаары төнүннэрэн, төлөөбүт эрэ сууматын ылан, сыана уларыйбытыгар майгынныыр саҥа табаары атыылаһар кыаҕа суох хаалар түгэниттэн көмүскүүр сыаллаах.

Олунньу 1 күнүттэн туһанааччы быраабын кэһии иһин 50% ыстарааптааһын бэрээдэгэ уларыйар.

Кирэдьииттэр уонна ипотека

«Дьиэ кэргэн ипотеката» бырагыраама быраабылалара уларыйыахтара. Ол курдук, дьиэ кэргэн биир эрэ чэпчэтиилээх ипотеканы ылар кыахтаныа. Урут кэргэнниилэр хас биирдиилэрэ биирдии кирэдьиит ылыахтарын сөп буолара. Ону таһынан, кирэдьиит ыларга дуогабарга кэргэнниилэр иккиэн созаемщик быһыытынан киириэхтээхтэрэ. Саҥа быраабылалар аймах-билэ дьону «донор» быһыытынан туһанан чэпчэтиини ылары боболлор, тоҕо диэтэххэ билигин дьиэ кэргэҥҥэ биир лимиит иһинэн кэргэнниилэр иккиэн кытталлара кытаанахтык хонтуруолланар.

Ону тэҥэ олунньу 1 күнүттэн «Уһук Илин уонна Арктика ипотеката» бырагырааманан дьиэ атыылаһыытыгар саҥа быраабылалар күүстэригэр киирэллэр. Чэпчэтиинэн дьиэни эбийиэги быһаччы туппут тутааччыттан эрэ атыылаһар кыаллыаҕа.