«Омрик» диэн ааттаах мэкчиргэни зоопааркаҕа илдьибиттэр

Ааспыт ый ортотугар Мэдиссиинискэй реабилитацияҕа уонна спортивнай мэдиссиинэҕэ өрөспүүбүлүкэтээҕи киинин үлэһиттэрэ,  тэрилтэлэрин территориятыттан кыракый куттаммыт  мэкчиргэни булбуттара.  

Билигин мэкчиргэ «Орто дойду» зоопааркаҕа карантиҥҥа  олорорун туһунан Экология министиэристибэтэ иһитиннэрдэ.

Мэдиссиинискэй реабилитацияҕа уонна спортивнай мэдиссиинэҕэ өрөспүүбүлүкэтээҕи киинин үлэһиттэрэ кэпсээбиттэринэн, көтөрү тэрилтэ дьиэтигэр киин киирэр аанын кирилиэһин анныттан булбуттар. Итиэннэ тута зоопаарка үлэһиттэрин, ол кэннэ Саха сиринээҕи экологическай судаарыстыбаннай кэтээн көрүү иниспиэктэрдэрин кытта сибээстэспиттэр.

Киин үлэһиттэрэ мэкчиргэни «Омрик» диэн ааттаабыттар (ол эбэтэр «Отделение медицинской реабилитации»).

Иниспиэктэрдэр мэкчиргэни ылан бэтэринээрдэргэ көрдөрбүттэр, ол кэннэ
«Орто дойду» зоопааркаҕа илдьибиттэр. 

«Орто дойду» зоопаарка салайааччытын солбуйааччы  Наталья Сафонова иһитиннэрбитинэн, көтөр туруга этэҥҥэ. Биир ый карантиҥҥа укпуттар.