Омук тылларын аҕыйатыы уонна нуучча тылыгар интэриэһи үрдэтии

Арассыыйа Бэрэсидьиэнэ Владимир Путин судаарыстыбаннай тыл бэлиитикэтин сүрүннэрин бигэргэтэр туһунан ыйаахха илии баттаата.

Бу ыйаах нуучча тылын, Арассыыйа өрөспүүбүлүкэлэрин судаарыстыбаннай тылларын харыстыырга, сайыннарарга уонна өйүүргэ, итиэннэ аан дойдуга нуучча тылын тарҕатарга туһуламмыт. Докумуон быраап аакталарын официальнайдык  саайтыгар та5ыста.

Ыйаахха этиллэринэн, нуучча тыла – Арассыыйа национальнай баайа-дуола, элбэх омуктаах норуоту сомоҕолуур Арассыыйа уонна аан дойду култууратын суолталаах элэмиэнэ буолар.

«Арассыыйа нуучча тылын туттууну хааччахтыыр, нуучча култууратын (ол иһигэр нуучча литэрэтиирэтин) «суох оҥорор», Арассыыйа иһитиннэрэр-биллэрэр киэҥ эйгэтин дискриминациялыыр, Арассыыйа үгэс буолбут духуобунай-сиэрдээх сыаннастарыгар утары барар идиэйэҕэ олоҕурбут соҥнуур холонуулары ситиһиилээхтик утарылаһар», — диэн докумуоҥҥа бэлиэтэнэр.

Салгыы судаарыстыбаннай тыл бэлиитикэтин эйгэтигэр биэс куттал баара ыйыллар. Олор истэригэр – аналогтаах эбэтэр нуормалыыр тылдьыттарга киирбэтэх омук тылларын төрүөтэ суох туттуу. Ону таһынан сорох омук дойдуларын нуучча тылын туттуутун, Арассыыйа норуоттарын тылларын илдьэ сылдьааччыларын ахсаанын уонна ол тыллар туттуллар эйгэлэрин кыччатар холонуулара бэлиэтэнэр.

Ыйаах быһыытынан, кириллицаҕа олоҕуран Арассыыйа норуоттарын алпаабыттарын оҥоруохтара, Арассыыйа өрөспүүбүлүкэлэрин судаарыстыбаннай тылларыгар оскуола үөрэҕин кинигэлэрин биир кэлим систиэмэтин олохтуохтара. Ону таһынан, омук идэлээхтэригэр Арассыыйаҕа стажировканы ааһар кыаҕы биэрии, русистика эйгэтигэр омук дьонугар истипиэндьийэлэри уонна бириэмийэлэри олохтооһун былааннанар.

Судаарыстыбаннай тыл бэлиитикэтин олоххо киллэрии нуучча тылын харыстыырга уонна сайыннарарга, Арассыыйа гражданнарын нуучча тылын баһылааһыннарын таһымын үрдэтэргэ кыах биэриэҕэ. Ону таһынан, бу аан дойдуга нуучча тылын бөҕөргөтөргө уонна аан дойдутааҕы гуманитарнай эйгэҕэ Арассыыйа суолтатын үрдэтэргэ көмөлөһүөҕэ.