Омук уола дьахталлары албыннаан харчыны уорууга уорбаланар

Дьон түөкүттэргэ киирэн биэрэллэрэ күн-түүн тахса тураллар. Хара санаалаах дьон дьахталлары тапталга билинэн албынныыллара эмиэ баар буолбут. Биир оннук түбэлтэ дьыалата борокуратуураҕа көрүлүннэ.

СӨ Борокуратуурата 2001 с.т. Нигерия Өрөспүүбүлүкэтин гражданиныгар улахан суумалаах түөкүннээһиҥҥэ буруйдуур быһаарыытын бигэргэттэ.

Силиэстийэ көрдөрүүтүнэн, буруйданааччы Российскай Федерация территориятыгар олорон тэрийээччи, скамердар, куратордар уонна дроповодтар састааптаах тэриллиилээх түөкүттэр бөлөҕүн састаабыгар киирбит. Бу бөлөххө хас биирдиилэрэ тустаах ыйыллыбыт эбээһинэстэри толорбуттар.
Ол курдук, «скамердар» араас социальнай ситимнэргэ дьахталлары кытта билсиһэллэр эбит. Кинилэр өр суруйсууларын кэмигэр тапталга билинэн, баһыылканан бэлэх, баан каартатыгар харчы, ону ааһа баран массыына кытта бэлэх ыытыахпыт, тус көрсөн билсиһэр баҕалаахпыт диэн албынныыллар эбит.
Ити кэннэ баһыылканы ыытарга судаарыстыбаннай пошлинаны, таможня хомуурдарын, ону тэҥэ үп-харчы нолуогун, массыынаны тиэрдиигэ айан төлөбүрүн ыыталларыгар, о.д.а. дьахталлар өйдөрүн сүүйэллэрэ билиннэ.

Салгыы «дроповод» дьахталлартан баан каартатыгар киирбит үбү-харчыны тэриллиилээх бөлөх чилиэннэригэр ыытарынан үлэлээбит.

Ол курдук, дойду араас эрэгийиэннэрин олохтооҕуттан, ол иһигэр Саха сириттэн уопсайа 9,1 мөл. солк. тахса суумалаах харчы уоруллубут. Холуобунай дьыала суут көрүүтүгэр ыытылынна. Суһал-көрдүүр тэрээһиннэринэн буруйданааччыны Калужскай уобаласка туттулар уонна СИЗО-ҕа хаайдылар.