Онкодесаннар быйыл Саха сирин 14 улууһугар сырыттылар

Онкодесаннар улуустарга көһө сылдьан үлэлэрэ салҕанар. Быйыл десант 14 сырыыны оҥордо.

«Маннык сырыылар ыарыыны эрдэттэн буларга үчүгэй түмүктээхтэр. Быйыл онкодесант быраастара барыта  3653 киһини көрдүлэр, кинилэртэн 213 киһини эбии сиһилии көрдөрүүгэ ыыттылар.

Ыарыыны сэрэтэр  онкодесант түмүгүнэн,  28 киһиэхэ араак сибикитэ билиннэ (үксэ 1-2 стадия)”, — диэн СӨ доруобуйа харыстабылын миниистирэ Лена Афанасьева иһитиннэрдэ.

Владимир Путин көҕүлээбит “Доруобуйа харыстабыла” бырайыагын чэрчитинэн  “Саха Өрөспүүбүлүкэтигэр  онкология ыарыыларын утары охсуһуу” эрэгийиэннээҕи бырайыак олоххо киириэҕиттэн,  улуустарга 49 сырыы оҥоһуллан, Саха сирин 9974 олохтооҕун көрдүлэр.