Салгыы
Онкологическай киин 85 бырыһыана үмүрүтүллүбүт

Онкологическай киин 85 бырыһыана үмүрүтүллүбүт

Ааптар:
10.12.2022, 10:14
Бөлөххө киир:

Быйыл саас Дьокуускай куоракка аныгы ирдэбилгэ бары өттүнэн толору эппиэттиир саҥа Кардиологическай киин үлэҕэ киирэн сүрэх-тымыр ыарыылаахтары абыраата диир толору кыахтаахпыт. Билигин аны  нэһилиэнньэ Онкологическай киин хаһан тутуллан үлэҕэ  киирэрин күүтэрэ чуолкай.

Бу күннэргэ  эбийиэк тутуутун билсэ бара сырыттыбыт. Петр Алексеев аатынан уулусса 89-гар тиийдибит. Сүүнэ улахан эбийиэк тас үлэтэ барыта үмүрүтүллүбүт, таһырдьа ханнык да үлэ ыытыллыбата тута көстөр. Арай, тэлгэһэ аттыгар тутааччылар олорор сылаас болуоктарыттан исписэлиистэр, оробуочайдар итии чэй иһэн үссэнэ түһэн баран, эбийиэк диэки тиэтэллээхтик хаамаллар.

Эрдэ болдьоспуппутунан, “Адгезия” хампаанньа дьоҕус офиһыгар ыйдаран тиийбиппитигэр, учаастак маастара  Егор Кылыяров көрүстэ. Соторутааҕыта тутуу идэтин баһылаабыт эдэр уолга учаастак маастарын эппиэ­тинэһин сүктэрбиттэрэ элбэҕи туоһулуур, эдэр исписэлиис боччумнаах саҥатыттан-иҥэтиттэн барыта тута өйдөнөр. Дьоҕус офис иһигэр көмпүүтэр иннигэр умса түһэн олорор исписэлиистэр, тутааччылар биир кэм тохтоло суох тугу эрэ суруйаллар, суоттууллар.

Аҕыйах тылы кэпсэтээт, эби­йиэккэ таҕыстыбыт. Эбийиэк иһэ сып-сылаас, ахсынньы аам-даам тымныыта ханан да суох буола түстэ. Арай, сорох көрүдүөр, уот-күөс киирэ илигиттэн буолуо, борук-сорук соҕус. Саатар, таһыр­дьабыт хойуу туманынан бүрүллэн турара эмиэ оруолу оон­ньоон эрдэҕэ.

Егор Кылыяров эбийиэк ис өттүгэр туох-ханнык үлэ барарын кэпсии-кэпсии үксүн көрдөрдө. Билиҥҥи туругунан дьиэ ис өттүн оҥоруу, вентиляциятын уонна уотун-күөһүн ситимнэрин тардыы бара турара тута көстөр. Ол курдук, сорох биригээдэ эркиннэри эпсиэйдээн кырааскалыыр,  сорохтор уот ситимин, вентиляцияны тардаллар. Эркиннэри кыйа уонна үрдүлэринэн уот ситимин арааһа субуллан тураллар, электриктэр кирилиэстэринэн салҕана-салҕана киһи баттаҕын курдук иирбэ-таарба боруобаттары бэрийэллэр.

«Тас үлэлэр барыта үмүрүтүллүбүттэрэ. Билигин ис үлэ ыытыллар. Ол курдук, ис өттүн эпсиэй­дээһин (отделка), вентиляцияны уонна уот-күөс ситимин тардыы барар. Ити этиллибит хайысхаларынан анал биригээ­дэлэр аттарыллан үлэлииллэр. Билиҥҥи туругунан эбийиэк 85 бырыһыана тутулунна. Билигин 120 киһи  сарсыарда 8 аҥаартан киэһэ 18 чааска диэри үлэлиир. Кыраапыктан хаалыы суох, барыта этэҥҥэ баран иһэр. Эбийиэги тутуу 2019 сылтан саҕаламмыта уонна былаан быһыытынан барыта этэҥҥэ бардаҕына, 2023 сыл ахсынньытыгар үлэҕэ киириэҕэ. Эбийиэги “Адгезия” уонна “Кинг-95” тэрилтэлэр туталлар. “Кинг-95” тас өттүн оҥорбута уонна лииптэри туруоруохтара», – диэн Егор Геннадьевич бу күннэргэ сүрүн эбийиэккэ туох үлэ-хамнас ыытылла турарын туһунан иһитиннэрдэ.

Эбийиэккэ билиҥҥи туругунан уот ситимин тардыыга улахан болҕомто ууруллубут диэн бэлиэ­тии көрдүм. Иирбэ-таарба курдук уот ситимин тардааччы элбэх. Биллэн турар, уот ситимин киллэрии сүрүн уонна олус эппиэтинэстээх үлэ буолара өйдөнүллэр. Этэргэ дылы, биир ситим сыыһа-халты холбонуллуо суохтаах буоллаҕа.

Чурапчыттан төрүттээх Иван Сидоров уот ситимин тардыыга үлэлээбитэ ырааппытын туһунан иһитиннэрдэ. «Онкологическай киин уотун ситимин тардыыга алтыс ыйбын үлэлии сылдьабын. Барыта былаан быһыытынан баран иһэр. Уот ситимин бырайыак, чертеж быһыытынан тардабыт, оҥоробут. Бэйэм Дьокуускайга олоробун, онон үлэлииргэ-хамсыырга үчүгэй, этэҥҥэ. Хамнаспытын хойутаппакка, кэмигэр төлүүллэр», – диэн уопуттаах элиэктирик кэпсээтэ.

Манна даҕатан эттэххэ

Онкологическай киин 25 тыһ. 670 кв. м иэннээх. Ону тэҥэ, 480 кв. м иэннээх гараастаах буолар. Киин стационара 180 куойкалаах уонна биир симиэнэҕэ 210 киһини көрөр поликлиникалаах. Сылга, ортотунан, 4 тыһ. кэриҥэ эпэрээссийэ оҥоһуллуоҕа. Саҥа кииҥҥэ аныгы ирдэбилгэ толору эппиэттиир мэдиссиинискэй оборудованиелар атыылаһыллыахтара, эбии 653 үлэ миэстэтэ аһыллыаҕа.  Киин «Доруобуйа харыстабыла» национальнай бырайыак иитинэн тутуллар.

Лента
Салгыы
31 января
  • -46°C
  • Ощущается: -46°Влажность: 65% Скорость ветра: 0 м/с

Сообщить об опечатке

Текст, который будет отправлен нашим редакторам: