Онкология диспансерын быраастарын 12 улууска күүтэллэр

Онкология өрөспүүбүлүкэтээҕи диспансера  араак курдук уодаһыннаах ыарыыны утары охсуһарга  араас хайысхалаах үлэни ыытар. 

Бүгүн диспансер десана Уус Алдан улууһугар барда. Үрдүк таһымнаах исписэлиистэр манна  муус устар 1-5 күннэригэр үлэлиэхтэрэ. Онкология десанын састаабыгар онкология кылаабынай бырааһын солбуйааччы, онкогинеколог Светлана Мыреева, онколог-быраас, Оройуоннааҕы киин балыыһа сүрүннээччитэ Варвара Долгунова, эндоскопист-быраас Людмила Егорова, эндоскопия  сиэстэрэтэ Алла Бурцева, УЗИ бырааһа  Саргылана Николаева, медбрат-анестезист Семен Новогородов бааллар.

Онтон сотору диспансер өрөспүүбүлүкэ олохтоохторун  доруобуйаларын туругун бэрэбиэркэлиир уонна онкология ыарыыларыттан харыстыыр сыаллаах-соруктаах  12 улууска тиийэн үлэлиэҕэ.

Абыраллаах эмчиттэри Алдан, Амма, Үөһээ Бүлүү, Горнай, Кэбээйи, Мэҥэ Хаҥалас, Нерюнгри, Ньурба, Өлүөхүмэ, Томпо, Уус Алдан, Уус Маайа улуустарыгар күүтэллэр.

Онкология десана РФ Бэрэсидьиэнэ Владимир Путин көҕүлээбит “Доруобуйа харыстабыла” национальнай бырайыагын чэрчитинэн ыытыллар.