Онкологияҕа сыһыаннаах олоҕо суох иһитиннэриилэргэ итэҕэйимэҥ!

 «Өрөспүүбүлүкэ социальнай ситимнэригэр онкология ыарыыларыгар химиянан терапия буортулаах уонна кутталлаах диэн видеолаах иһитиннэрии тарҕанна (видеота английскай тылтан тылбаастаммыт). Бу иһитиннэрии олоҕо   суох. Чахчыта биллибэт  иһитиннэриилэргэ итэҕэйбэккитигэр көрдөһөбүт”.

Маннык иһитиннэриини Саха сирин Доруобуйа харыстабылыгар министиэристибэтин штаты таһынан кылаабынай онколога, мэдиссиинэ наукатын хандыдаата  Феодосия Иванова ыытта.

Кылаабынай онколог бигэргэтэринэн, билигин Арассыыйа уонна аан дойду мэдиссиинэтигэр араагы эмтээһин 3 эрэ ньымата: хирургия, сардаҥа (лучевой)  уонна эминэн (химиотерапия)  туһаныллар.

Арассыыйаҕа эминэн терапия, химиятерапия боротокуолларын наука уопсастыбата, Арассыыйа онкологтарын ассоциацията, Арассыыйа килиниичэскэй  онкологиятын уопсастыбата (RUSSCO)  оҥороллор уонна РФ Доруобуйа харыстабылын министиэристибэтин таһымыгар бигэргэтэллэр. Эмтээһин маннык боротокуоллара дакаастаммыт мэдиссиинэ тускулларыгар олоҕураллар уонна онон  онколог-быраастар бары салайтаран үлэлииллэр.