Хаартыска: Сахагов.ру
Дьокуускайдааҕы онкология диспансерыгар анестезиология, реанимация отделениетын исписэлиистэрэ аан бастаан хаан плазматыттан билирубины селективнай ыраастааһын ньыматын оҥордулар.
Өрөспүүбүлүкэ онкологтарын бу ураты процедураны ситиһиилээхтик түмүктээбиттэринэн Айсен Николаев эҕэрдэлээтэ.
«Уһук Илиҥҥэ аан бастаан мэдиссиинэ ураты процедуратын оҥордубут. Бу «Уһун көхтөөх олох» национальнай бырайыакка киирсэн, Саха сирин мэдиссиинэтин сайдыытыгар биир улахан хардыы буолар. Бу ситиһии Саха сирин быраастарын үрдүк идэтийиилэрин бигэргэтэр уонна хаачыстыбалаах эмтээһиҥҥэ саҥа кыахтары арыйар», — диэн MAX мессенджеригэр Айсен Николаев бэлиэтээтэ.
Плазманы ыраастааһын ыарахан туруктаах киһи этигэр-сиинигэр мунньуллар сүһүрүү бэссэстибэлэрин, ыарыыны үөскэтэр уонна да атын буортулаах компоненнары ыларга көмөлөһөр. Быраастар бастакы процедура кэмигэр сөхтөрөр түмүктэри бэлиэтээтилэр: сеанс ортотугар ыарыһах туруга биллэ тупсубута. Маннык процедураны оҥорорго анаан Саха сиригэр бастакы уонна билиҥҥитэ соҕотох аппарааты атыыласпыттара.
— Плазманы ыраастааһын диэн бүөр таһынааҕы хааны ыраастыыр аныгы ньыма буолар, — диэн быһаарда отделение салайааччыта Николай Ефимов. — Судургутук эттэххэ, хаан уустук чааһын — плазманы арааран, анал сорбционнай фильтрынан ыытабыт. Ыарахан ыарыы кэмигэр эти-сиини сүһүрдэр токсиннары, билирубины, килиэккэлэр ыһыллыыларын тобохторун уонна ыарыыны үөскэтэр бэссэстибэлэри ыраастыыр. Фильтрация кэнниттэн ыраастаммыт плазма ыарыһахха төттөрү кутуллар. Искэн уонна ыарахан инфекционнай ыарыылаах дьоҥҥо туруктарын биллэ тупсарар уонна эмтээһин көдьүүһүн үрдэтэр. Бастакы процедура кэмигэр билирубин таһыма икки төгүл түспүтүн көрдүбүт, бу ньыма көдьүүһүн бигэргэтэр.»
Плазманы ыраастааһын Арассыыйа уонна аан дойду сүрүн балыыһаларыгар киэҥник туттуллар. Бу эрэгийиэҥҥэ үрдүк технологиялаах мэдиссиинэ көмөтүн сайыннарыыга улахан суолталаах хардыы. Бу үлэ Арассыыйа бэрэсидьиэнэ Владимир Путин көҕүлээбит «Уһун уонна көхтөөх олох» национальнай бырайыагын чэрчитинэн ыытыллар.
Саха сирин онкологтара искэни эмтииргэ үрдүк технологиялаах уонна киһи этигэр-сиинигэр кыра орооһуулаах ньымалары туһанары кэҥэтэн иһэллэр. Саҥа хирургическай ньымалар киирэллэр уонна тупсарыллаллар, ол иһигэр: искэн радиочастотнай абляцията, 3D лапароскопическай уонна торакографическай ньымалар, эндолюминальнай эндоскопия, о.д.а. Саҥа дьиэ тутуллуоҕуттан, онкология диспансерыгар 5000-тан тахса эпэрээссийэ оҥоһулунна.
Ону таһынан, ангиограф курдук үрдүк технологиялаах тэриллэр кэлбиттэрин кэннэ, быар искэнигэр химиотерапияны артериянан киллэрии, тыҥа искэнигэр рентгенинэн көрөн, диагностическай пункцияны оҥоруу курдук эпэрээссийэлэри оҥорор кыах үөскээбитэ. Ангиограф кэлиэҕиттэн ыла 900-тэн тахса эпэрээссийэ оҥоһуллубут.
Лабораторнай сулууспаҕа геннэй уонна иммунофенотипическай диагностика аныгы ньымалара олоххо киирдилэр, искэн ыарыылары эрдэ быһаарыыга уонна эмтээһиҥҥэ бу суолталаах ньымалар.
Сиһилии аах: https://www.sakha.gov.ru/news/14646
Судаарыстыбаннай Дуума дьокутаата Игорь Антропенко оскуолаларынан оҕолорго Сэбиэскэй кэминээҕи Саҥа дьыллааҕы остуоруйалары көрдөрөр туһунан этии…
Ас-үөл хаачыстыбатыгар уонна куттала суох буолуутугар Ил Дархан иһинэн координационнай сэбиэт мунньаҕар оскуолалары, уһуйааннары, социальнай…
Саха сиригэр дойду биир саамай бөдөҥ уонна технологическай өттүнэн уустук инфраструктурнай бырайыага – Өлүөнэ күргэтин…
Өрөспүүбүлүкэ борокуруора Сергей Дябкин сорудаҕынан, Ленскэй улууһун борокуратуурата Ленскэй куорат «Севернай» түөлбэҕэ хас да элбэх…
Саҥа дьыллааҕы бырааһынньыктары көрсө Судаарыстыбаннай Дуума дьокутаата Олег Леонов ТАСС-ка биэрбит кэпсэтиитигэр пиротехниканы куттала суох…
ИДьМ сулууспатын Ньурба улууһун отделын дьуһуурунай чааһыгар олохтоох киһи суотабай төлөпүөнүн уорбуттарын туһунан сайабылыанньа суруйбут.…