Онкологтары бэлэмнээһин үлэтэ тэтимирэр

«Доруобуйа харыстабыла» национальнай бырайыак «Искэн ыарыыларын утары охсуһуу» бырайыагын чэрчитинэн, Дьокуускайдааҕы онкологическай киин тутуллан үлэҕэ киирэн эрэринэн, доруобуйа харыстабылын министиэристибэтэ тустаах  каадырдары бэлэмнииргэ үлэни ыытар.

2020 сылтан ХИФУ мэдиссиинэҕэ институтугар «Лечебное дело», «Анестезиология-реаниматология», «Клиническая лабораторная диагностика», «Онкология», «Патологическая анатомия», «Рентгенология» идэлэргэ, киин үөрэх кыһаларыгар: «Лечебное дело», «Анестезиология-реаниматология», «Онкология», «Радиотерапия», «Клиническая психология» идэлэргэ устудьуоннары үөрэттэрэллэр.

Маны тэҥэ, быраастары эрэ буолбакка, сиэстэрэлэри бэлэмнииргэ болҕомто ууруллар. Дьокуускайдааҕы мэдиссиинэ колледжа быйыл онкологическай кииҥҥэ анаан сиэстэрэ уонна лаборант идэлээх 35 исписэлииһи бэлэмнээн таһаарда.

— Исписэлиистэри бэлэмнииргэ былааннаах үлэ ыытылларын түмүгэр, онкологическай диспансер каадырдарынан хааччылынна. Диспансерга урут 22 онколог үлэлиир эбит буоллаҕына, билигин номнуо 51 онколог-быраас үлэлиир. Ону тэҥэ, быраастар сатабылларын, билиилэрин үрдэтэр сыалтан, Арассыыйа, Кытай, Корея онкологическай кииннэригэр стажировкалары тэрийэбит. Арассыыйа бастыҥ онколог-хирурдара Дьокуускайга кэлэн, быраастары үөрэтэллэр, — диэн доруобуйа харыстабылын миниистирэ Лена Афанасьева бэлиэтээтэ.

Доруобуйа харыстабылын министиэристибэтин пресс-сулууспата.