Оҥоһуу өйү салайар каадырдары иитэр сорук турар

Ил Дархан Айсен Николаев Кириэмилгэ Владимир Путин бэрэссэдээтэллиир РФ Судаарыстыбаннай Сэбиэтин мунньаҕар кыттыыны ылла. Мунньахха экэниэмикэни сүрүннүүр каадырдары бэлэмнээһин туһунан кэпсэттилэр.

Күн бүгүн каадыр боппуруоһа салаа бэйэтин дьыалата эбэтэр социальнай өрүттээх буолан бүттэ – кини национальнай сайдыы боппуруоһунан буолан турар.

“Бэрэсидьиэн кытаанах болдьоҕу туруорда – 10-15 сылы. Бу кэм иһигэр сүҥкэн технологическай трансформация барыахтаах. Оҥоһуу өй олохпутугар тоҕо анньан киирдэ. Үлэ ырыынагар уларыйыылар буоллулар. Билигин оҥоһуу өй систиэмэтин салайар кыахтаах, инженердии толкуйдуур айар дьону үөрэтэн-иитэр сорук турар. Дойдубут күөн күрэстэһэр кыаҕа, инникитэ онтон тутулуктаах.

Саха сиригэр оскуолаттан үрдүк үөрэххэ диэри экэниэмикэҕэ туох наада буоларынан үөрэтэн-иитэн таһаарар систиэмэ оҥоһуллан турар. Соторутааҕыта Туһаайан этиибэр Оҥоһуу өйгө сэбиэти тэрийэр туһунан эппитим, манна каадыр боппуруоһунан эмиэ дьарыктаныахтара. Биһиги оҥоһуу өйү уонна роботу куттал курдук көрбөппүт, Уһук Хоту сиргэ көмөлөһөөччү быһыытынан сыаналыыбыт: киһитэ суох тырааныспар, сыыппара өҥөлөр, “өйдөөх” ОДьКХ, тарҕатыллыбыт энэргиэтикэ,” — диэн Ил Дархан бэйэтин телеграм-ханаалыгар суруйбут.