“Оонньоо, мин баяным” куонкурус кыайыылаахтара

Ахсынньы 14 күнүгэр М.Н. Жирков аатынан Дьокуускайдааҕы музыкальнай кэллиэскэ СӨ култууратын үтүөлээх үлэһитэ Чурапчыттан төрүттээх Иннокентий Романов аатынан “Оонньоо, мин баяным” диэн баяҥҥа, аккордеоҥҥа, норуот инструменнарын ансаамбылларын, норуот инструменнарын оркестрдарын толорооччуларыгар  II Аһаҕас куонкурус буолан ааста. 

Куонкуруһу көҕүлээччилэринэн И.И. Романов бииргэ төрөөбүт эдьиийдэрэ Д.И. Романова уонна А.И. Климова буолаллар.

Күрэстэһии “Солист” уонна “Ансаамбыл” категорияларынан барда. Манна Хатастан, Бороҕонтон, Намтан, Ньурбаттан, Кэбээйиттэн Кэрэ эйгэ оскуолалара, Майатааҕы Кэрэ эйгэ оскуолатын Аллараа Бэстээхтээҕи филиала кытыннылар. Ону тэҥэ Чурапчы Арыылааҕыттан, Мэҥэ Хаҥалас Тиэлигититтэн, Табаҕа сэлиэнньэтиттэн, Дьокуускай куораттан идэтийбиттэр уонна бэйэлэрэ сөбүлээн дьарыктанааччылар кытыннылар. “Обработка” анал аакка толорооччу-баянистар бэйэлэрин матырыйаалларын оонньоон иһитиннэрдилэр, олору бэйэбит эрэгийиэммит айымньыларын хомуурунньугар киллэриэхтэрэ диэн эрэнэбит.

Куонкурус түмүгүнэн Гран-при кыайыылааҕынан Чурапчы улууһун Дириҥнээҕи Кэрэ эйгэ оскуолатын (П.И. Тарабукин кылааһа), Дьокуускайдааҕы музыкальнай кэллиэс (Раиса Крылова кылааһа) выпускниктара, билигин АГИКИ устудьуона (Николай Пикутскай кылааһа)  Дьулустаан Васильев буолла.

1 истиэпэннээх лауреаттарынан — ансаамбылынан толорууга Аллараа Бэстээх “Вдохновение” ансаамбыла, биирдиилээн толорууларга Талбан Парников (Намнааҕы Кэрэ эйгэ оскуолата), 2 истиэпэннээх лауреаттарынан Аман Корякин (Бороҕоннооҕу КЭО), Настасья Мордвинова (Аллараа Бэстээхтээҕи  филиал), 3 истиэпэннээх лауреаттарынан Сергей Стручков (Аллараа Бэстээхтээҕи  филиал), Георгий Васильев (Ньурбатааҕы КЭО), 1 истиэпэннээх дипломанынан Андрей Колодезников (Хатастааҕы КЭО), 3 истиэпэннээх дипломанынан Марк Игнатьев (Хатастааҕы КЭО) буоллулар.