Оонньуулар усталарыгар Спортивнай дэриэбинэ олоҕо оргуйан олордо

Дьокуускай куоракка Устудьуоннар куораттарыгар Спортивнай дэриэбинэ олоҕо оргуйан олорор. Манна «Азия оҕолоро» норуоттар икки ардыларынааҕы оонньууларга кытта сылдьар спортсменнар уонна ыалдьыттар олороллор. Ыалдьыттарга анаан күн аайы араас элбэх тэрээһин ыытыллар.

Бүгүн Спортивнай дэриэбинэ култуурунай олоҕун туһунан бырагырааманы тэрийсэн ыытааччы Снежана Саввинова кэпсиир:

— Спортсменнар дэриэбинэлэригэр бэс ыйын 25 күнүттэн үлэлии сылдьабыт. Атын дойдулартан кэлбит оҕолору көрсөн, кинилэр сынньалаҥнарын тэрийэбит. Спортсменнар дэриэбинэлэрин мээринэн Степан Павлов үлэлиир, оттон биһигини, култуурунай бырагырааманы ыытааччылары Айталина Сыроватская салайар. Ону таһынан ХИФУ Култуурунай киинин бары үлэһиттэрэ бу тэрээһиннэри иилээн-саҕалаан тэрийсэллэр. Уус-уран салайааччынан Анастасия Неустроева үлэлиир.

Күн аайы кыайбыт спортсменнар дойдуларын былааҕын өрө көтөҕүүнү тэрийэбит. Киэһэтин 5 чаастан 9-с чааска диэри аралдьытар араас тэрээһиннэри ыытабыт. Күнтэн күн тэрээһиннэргэ кыттар оҕолор элбээн иһэллэр, бэйэ-бэйэлэрин кытары билсэн, доҕордоһон күргүөмүнэн сылдьаллар. Омук оҕолоро олус көхтөөхтөр, сылбырҕалар, эмоциональнайдар, туохтан да иҥнэн-толлон турбаттар, барытыгар кыттан иһэллэр эбит.

Ыалдьыттарбытыгар анаан хабылык, хаамыска күрэхтэһиитин, фольклор, кавер, араас тематическай, «уу уонна күүгэн» биэчэрдэрин, «Камелек» хампаанньа муода көрдөрүүтүн, холи кырааска бэстибээлин тэрийэн  ыытыбыт. Клавдия уонна Герман Хатылаевтар саха төрүт ырыатыгар-тойугар, инструменнарыгар оонньуурга иккитэ маастар-кылаас оҥорбуттара, оҕолор олус интэриэһиргээбиттэрэ. Хатылаевтарга улахан махталбытын тиэрдэбит. Икки күн устуудьуйаларыгар дьарыктыыр оҕолорун аҕалан кытыннарбыттара, ол кэнниттэн омук оҕолоро сахалыы инструменнары сэргээннэр, өссө икки күн маастар-кылаас оҥорбуттара. Куукуланы оҥорууга, хомуска, кырыымпаҕа оонньуурга, мас тардыһыытыгар, о.д.а. маастар-кылаастар ыытылыннылар. Атын даҕаны артыыстар ыҥырыыбытын ылынан кэлэн кыттаннар, тэрээһиммитин киэргэттилэр. Аныгы кэм хаамыытынан, К-поп челлендж, батлл фристайл тэрээһиннэрбит, аквадискотека ыалдьыттары түмэ тартылар. Бириэмэбит олус кылгас, бырагыраамабыт киэҥ буолан, дискотекаларга олус кыра бириэмэ хаалар. Оҕолор билсээри-доҕордоһоору өр үҥкүүлүөхтэрин баҕараллар. Бу уон биир күн устата олус тыҥааһыннаах, ол эрээри интэриэһинэй, күүстээх үлэ күннэрэ аастылар.